Халықаралық балаларды қорғау күніне орай Маруа Кұлұшева атындағы арнаулы әлеуметтік қызметтерге мұқтаж балаларды қолдау орталығында «Менің Қазақстаным» атты асфальтқа сурет салу байқауы өтті.
Шараға Жезқазған қалалық аналар кеңесі мұрындық болды. Балалар түрлі-түсті бормен туған жерге деген махаббатын бейнелеуге тырысты. Олардың қиялынан туған суреттерде аспан, күн, гүлдер мен мемлекеттік рәміздер көрініс тапты. Мұндай шаралар бүлдіршіндердің шығармашылық қабілетін дамытып, Отанға деген сүйіспеншілікті арттырады.
Жезқазған қалалық Аналар кеңесінің мүшесі Айткүл Машахаева балаларымыз еркін өмір сүріп,жақсы жағдайда аңсаған армандарына жете берсін деп ақжарма тілегін жеткізді.
Үздік деп танылған жұмыстар арнайы марапаттарға ие болды. I, II және III орын иегерлеріне қала әкімдігінің грамоталары мен естелік сыйлықтар табысталды. Сондай-ақ барлық қатысушылар тәтті сый-сияпатқа ие болды. Шара соңында балалар өлең оқып, ән шырқап, мерекелік көңіл күйге бөленді.
