Қоғамның тыныштығын күзетіп, өзгелердің қауіпсіздігі үшін өз басын қатерге тігіп жүрген полицейлердің еңбегі ерен. Олар кез келген уақытта сапқа тұрып, қызметке кірісе кетеді.
Бұл жолы Ұлытау облыстық полиция департаментінің қызметкерлері ҚР Ішкі істер министрлігінің бастамасы аясында «Спортта да, қызметте де қадам сайын алға!» атты акцияға үн қосты. Эстафетаны қарағандылық әріптестерінен қабылдап алған. Челлендж 1 ақпанда басталған және жылдың соңына дейін жалғасады. Еліміздің барлық өңірлері қамтылады. Тәртіп сақшылары 10 км қашықтықты жүгіріп өтті.
Марафон Жезқазған әуежайында басталды. Спорттық шараға 100-ге жуық құқық қорғаушы қатысты. Тек қатардағы полиция қызметкерлері ғана емес, департамент басшылығы да марафонды қолдады. Сондай-ақ, марафонға арнайы бөлімшелердің командирлері мен жедел әрекет ету арнайы жасағының сарбаздары шақырылған.
Жұмысына берілген тәртіп сақшылардың қатарында 52 жастағы Ұлытау обылсы ПД ЖПҚ басқармасы бастығының орынбасары Ерғали Қожабеков бар. Ол қызметте ғана емес, сондай-ақ спортта да үздік. Бүгін оны жүгіру барысында дәлелдеп шықты.
Сондай-ақ оқыңыз
Қашықтықты сәтті еңсерген Ұлытау облысы ПД қызметкерлері эстафетаны сыр өңіріне, яғни Қызылорда облысындағы әріптестеріне жолдады. Осылайша акция еліміздің барлық өңірін қамтиды.
Гүлім МАРАТҚЫЗЫ.
