Жезқазғанда жаңа спорт базасының құрылысы басталды. Аталмыш нысан ескек есуші спортшыларды қолдау бағытында қолға алынды. Алайда, Ұлытау облысының әкімі Берік Әбдіғалиұлы бұл кешен қыс мезгілінде шаңғы спортын дамытуға да қолданылатынын жеткізді.
Негізінен, нысан өңіріміздегі ескек есуші спортшылардың шеберлігін шыңдау мақсатында қолға алынды. Орайы келгенде айта кетейік, спорттың бұл түрінен жерлестеріміз биік белестерді бағындыруда. Маусымның 14-16 аралығында Таиландта өткен Азия чемпионатында Малика Турсын мен Виктория Фалолеева күміс және қола медальға қол жеткізді.
Десек те, жаңа спорт базасы өңірімізде кенже қалған шаңғы спортын дамытуға да өз септігін тигізетін болады. 4 жарым гектардан астам жерді алатын спорт базасының корпусы қос қабатты. Бірінші қабатында ойын залы, күзет бөлімі, медициналық пункт, қойма, жылу торабы, жаттығушылар мен жаттықтырушылардың жуыну-киіну бөлмесі, шаңғышылардың киім ауыстыруға арналған орындары жоспарланған. Екінші қабатта жаттығу залы, қабылдау бөлмесі, мәжіліс залы, ескек есу спорт түрлерінің жаттықтырушылары залы, әкімшілік, бухгалтерия, жуыну-киіну бөлмелері болмақ. Нысанның қолданысқа берілу уақыты 2025 жылдың соңына жоспарланған.
Гүлім МАРАТҚЫЗЫ.
