Еңбек адамдарының арасында спортты насихаттап, салауатты өмір салтының маңыздылығын түсіндіруде «Қазақмыс Мэйнтенанс Сервисиз» ЖШС басшылығы мен «КәсіпҚорған» кәсіподағы, «Jastar Bolashaq» Жастар одағы түрлі шараларды жүзеге асырып келеді.
Жауапкершілігі шектеулі серіктестіктің құрамындағы тау-кен, шахта жабдықтары зауыты мен Жезқазғансервис кәсіпорнының еңбеккерлері «КәсіпҚорған» кәсіподағы ұйымдастыратын жарыстарға үнемі белсенділікпен қатысуда.
Еңбек күніне орай жер астында техникаларға сервистік қызмет көрсететін сала мамандарының арасында спартакиада ұйымдастырды.
Жезқазғансервис кәсіпорнының спорт десе делебесі қозатын еңбеккерлері спартакиада шеңберіндегі спорт түрлерінен жеңімпаз атануға тырысты. Команда болып бақ сынаған оларға ойынның ауырлығы жеңіп шығуға кедергі болмады. Спартакиадада үздік деп танылған командаларға жүлделі орындар табысталды.
13 команданың арасынан І орынды Анненск шахтасындағы сервистік телім ұтып алса, екінші орынды Шығыс Жезқазған кеніші № 57 шахтаның сервистік телімі еншіледі. ІІІ орынның жүлдесі Жезқазғансервис кәсіпорны қойма шаруашылығының командасына бұйырды.
Бағдат ҚАЗКЕНОВ.
