2024 жылғы 20 қарашада «Қазақмыс Мэйнтенанс Сервисиз» ЖШС-де «КәсіпҚорған» кәсіподағының қолдауымен «Кәсібінің үздігі-2024» кәсіби шеберлік байқауы өтті.
Жарысқа «Жезқазғансервис» және тау-кен, шахта жабдықтары зауытының жерасты электр-слесарьлары мен слесарь-жөндеушілері қатысты. Байқауда 26 үміткер бақ сынады.
Байқаудың негізгі мақсаты – кәсіби даярлық сапасын арттыру, қызметкерлердің біліктілігі мен дағдыларын дамыту, сондай-ақ өз мамандығының үздігін анықтау, еңбек қауіпсіздігі және еңбекті қорғау бойынша корпоративтік стандарттар талаптарын білу.
Байқау екі кезеңнен тұрды. Бірінші кезеңде қатысушылар сұрақ- жауап үлгісіндегі тестілеуден өтті. Бұл теориялық білімді бағалауға мүмкіндік берді. Екінші кезеңде қатысушылар өздерінің кәсіби жұмысына байланысты тапсырмаларды орындай отырып, практикалық дағдыларын көрсетті.
Байқауды ұйымдастырған «КәсіпҚорған» кәсіподағы комитетінің төрағасы Мәриямкүл Тәкішева мұндай шара еңбеккерлердің білімі мен тәжірибесін саралап қана қоймай, бірлесе жұмыс жасауға жұмылдыратынын алға тартты.
Шеберлік сынында үздік шыққан Оңтүстік Жезқазған кеніші № 65 шахтадағы сервистік телімнің жер асты электр-слесарі Мадияр Өмірбеков І орынды жеңіп алды. Тау-кен, шахта жабдықтары зауытындағы құрастыру цехының слесарь-жөндеушісі Ардақ Сейтқұлов ІІ орынды еншілесе, ІІІ орынның жүлдесі «Жыланды» кеніші «Сары-Оба» шахтасындағы сервистік телімнің электр-слесарі Нұрғазы Ахметовтің үлесіне тиді.
Байқау жеңімпаздары дипломдармен және ақшалай сыйлықтармен марапатталды. Сонымен қатар, қатысушыларға арнайы номинациялар бойынша ақшалай сыйлықтар табыс етілді.
Бағдат ҚАЗКЕНОВ.
