Наурыз – халқымыздың ежелден тойлап келе жатқан көктем мерекесі, жыл басы. Бұл – табиғаттың жаңаруымен қатар, адамдардың да бір-біріне ізгі тілек айтып, татуласатын, бауырмалдық пен бірлікті дәріптейтін ерекше мейрам. Бұл күні Сәтбаев қаласында да Наурыз мейрамы кең көлемде аталып өтті.
Мереке қарсаңындағы кеншілер қаласының келбеті жылдағыдан мүлдем өзгеше болды. Шаһардың басты көшелеріне қызғалдақ пішіндегі шамдар ілініп, олар түнде қалаға сән беріп, қызылды жасылды сәулесін шашып тұрды. Ал, орталық алаңда халқымыздың көнермес аңыздарының кейіпкерлері орнатылып, тұрғындар мен қала қонақтары сол мүсіндердің қасында суретке түсіп, мәре-сәре болды.
Жалпы, еліміздің барлық аймақтарындағы сияқты Сәтбаев қаласында да дәстүрлер мен әдет-ғұрыптар тамыр жайған ұлттық мерекені атап өтуге арналған «Наурызнама» тұжырымдамасы кезең-кезеңімен аталып өтті. «Наурызнама» онкүндігі Көрісу күнінен бастау алып, Наурыз мейрамының мән-мағынасы мен мазмұнын байытатын түрлі іс-шараларды қамтыды
Ал, Наурыз мейрамы қалада кең көлемде тойланды. Бұл күні орталық алаңда ғана емес, шаһардың шағынаудан тұрғындары да Ұлыстың ұлы күнін арқа-жарқа қарсы алды. Оған қаланың Абай және Шаталюк көшелерінде өткен наурыз думаны айқын айғақ. Аталмыш көшелерде мереке аясында ақ дастарқан жайылып, қонақтарға наурызкөже мен түрлі ұлттық тағамдар ұсынылды. Тұрғындар бір-біріне ақ тілектерін арнап, жақсылық пен молшылық тіледі. Наурыз тек көктемнің келуін емес, көршілер арасындағы бірлікті нығайтудың да тамаша мүмкіндігі. Көпшіліктің белсенді қатысуы бұл мерекенің маңызын тағы бір мәрте дәлелдеді.
Орталық алаңдағы Наурыз думаны театрландырылған көріністермен бастау алды. Құмай тазы жетектеп, қыран құс ұстаған топ шеруі тамашаның сәнін келтіре түссе, көпшілікке танымал Тазша бала мен байдың арасындағы әрекет көрерменнің көңіл күйін көтерді. Қаланың өнер ұжымдары мен өнерлі өрендері сахнада әуелете ән салып, күмбірлете күй төкті, мың бұрала биледі. Қыдыр баба жиналған жұртшылыққа бата беріп, ақжарма тілегін жолдады.
Ұлық мерекені халықпен бірге тойлауға келген қала әкімі Мұрат Бөрібаев та тұрғындарды Наурыз мерекесімен құттықтап, бақ-береке тіледі.
– Наурыз – халқымыз асыға күтетін мереке. Бұл – қыстың ызғары кетіп, көктемнің шуағы төгілетін, табиғат түлеп, тіршілік жаңаратын ерекше сәт. Ежелден халқымыз бұл мерекені ырысты ынтымақтың, бірліктің символы деп білген. Бүгінде бұл мейрамды тек қазақ халқы ғана емес, елімізді мекендеген барлық ұлт өкілдері бірлесе атап өтеді. Сол себепті, Наурыз – нағыз халықтық мереке. Бауырмалдық, жанашырлық, сыйластық, отаншылдық сияқты құндылықтардың бәрі осы күнде көрініс табады. Сіздерді осы шуақты көктем мерекесімен шын жүректен құттықтаймын! Ұлыс оң болсын, ақ мол болсын! – деді Мұрат Ерболатұлы өз сөзінде.
Мереке күні орталық алаңда тойшыл қауым үшін ақшаңқай киіз үйлер бой көтеріп, этноауыл орын тепті. Жағалай тігілген киіз үйлерде мерекеге жиналған көпшілікке наурызкөже, ыстық бауырсақ таратылды. Киіз үйлер ішінде қазақ халқының дәстүрлері көрсетілді. Түрлі спорттық сайыстар ұйымдастырылып, мереке көркін қыздыра түсті.
– Бүгін біз ұлттық мерекеміз – Наурызды тойлап жатырмыз. Бұл жай ғана тойлау емес, ұлттық дәстүрлердің жаңғыруы, жаңару мен халық бірлігінің тойы. Ежелден бері қазақ халқы көктемнің келуін қуанышпен және ізгі тілектермен қарсы алады. Екінші жыл қатарынан Наурыз онкүндік форматында тойланып отыр. Онкүндік 14 наурызда Көрісу күні – кешірім мен қауышу күнімен басталды, одан кейін бірлік, тазалық және қайырымдылық күндеріне жалғасады. Мұның бәрі жас ұрпақтың дәстүрге деген құрметін қалыптастырып, отбасылық құндылықтарды нығайтып, адамдар арасындағы достық қарым-қатынасты күшейтеді. Бүгінгі жастардың ұлттық киімін мақтанышпен киіп, ата-баба мұрасына қызығушылық танытуы көңіл қуантады. Өйткені олар өздері көріп өскен салт-дәстүрлерімізді келер ұрпаққа жалғастырады.
Барша сәтбаевтықтарды осы тамаша мерекемен шын жүректен құттықтаймын! Әр шаңыраққа молшылық, береке және бақыт тілеймін, елімізде әрдайым бейбітшілік пен бірлік болсын! Ұлыс оң болсын, ақ мол болсын! – дейді «ТМД-ның Құрметті энергетигі», «Сәтбаев қаласының Құрметті азаматы» Жайық Мұңсызбаев.
Сонымен қатар бұл күні қолөнер шеберлерінің көрмесі ұйымдастырылды. Көрмеде тұрғындар ұлттық бұйымдармен, зергерлік өнермен, ағаш және тері өңдеу шеберлігінің үлгілерімен танысты. Әсіресе, балалардың қолымен жасалған жұмсақ ойыншықтар мен түрлі-түсті қуыршақтар көрермендердің көз жауын алды.
Мерекелік іс-шаралар ақшанқан киіз үйлі ауылда таңертеңнен басталып, қазақтың ұлттық тағамдары әзірленді. Келген қонақтар мен қала тұрғындарына наурызкөже, бауырсақ, қымыз және басқа да ұлттық тағамдар ұсынылды.
– Наурыз – берекенің бастауы. Бүгін халыққа арнап наурызкөже, бауырсақ, қымыз сынды ұлттық тағамдарды тегін тараттық. Бұл – ата-бабамыздан қалған игі дәстүр, халқымыздың қонақжайлығының белгісі. Келген қонақтар ризашылықтарын білдіріп, ақ тілектерін айтып жатыр. Мұндай шаралар халықтың бірлігін арттырып, ұлттық құндылықтарымызды дәріптеуге үлкен үлес қосады деп ойлаймын, – дейді қалалық мәслихат төрағасының міндетін атқарушы Шолпан Жанғаскинова.
Осылайша, кеншілер қаласында Ұлыстың ұлы күні бар сән-салтанатымен тойланып, жұртшылық бір-біріне ақжарма тілектерін арнады. Бұл күнгі мерекелік көңіл-күй – көпшіліктің есінде ұзақ сақталары сөзсіз. Өйткені, мереке күні қызмет борышы бойынша қала тұрғындарының қауіпсіздігін, денсаулығы мен жайлылығын қамтамасыз ете отырып, мерекелік түнді өз бекетінде өткізетіндер жандар да назардан тыс қалған жоқ. Қала әкімі Мұрат Бөрібаев пен қалалық мәслихат төрағасының міндетін атқарушы Шолпан Жанғаскинова және Қоғамдық кеңес төрағасы Қайрат Смайлов жедел жәрдем, полиция, өрт сөндіру бөлімі және № 1 жылу беру станциясы мен қалалық жылумен, сумен қамтамасыз ететін мекеменің қызметкерлерін арнайы барып құттықтап, ізгі тілектерін жеткізді.
Ізтай БЕЛГІБАЙҰЛЫ.
