Елімізде маусым айының екінші жексенбісінде жеңіл өнеркәсіп саласының қызметкерлері өздерінің кәсіби төл мерекелерін атап өтеді. Тігін және тоқыма өнеркәсібін заманауи технологиялар арқылы жетілдіріп отырған «Ютария LTD» ЖШС кәсіпорнының тігіншілер қауымы бұл мерекеге сапалы өнім өндіру көрсеткішімен жетіп отыр.
Сары мыстың алыбы саналатын «Қазақмыс» корпорациясы» ЖШС өндіріс ошақтарындағы жұмысшыларға және бірнеше мекемелерге тапсырыстық негізде арнайы киім тігетін кәсіпорынның бүгінгі қадамы нық. Кәсіпорынның тігу цехына жаңадан тігін машинасы орнатылып, өнім сапасы арта түсуде.
«Ютария LTD» ЖШС кәсіпорны еліміздегі тігін және тоқыма өнімдерін сапалы өндіруші құрылым. Оның сапа деңгейі халықаралық стандарттарға негізделген. Сондықтан бұл кәсіпорын жеңіл өнеркәсіп саласында үнемі көш басында келеді.
Астана, Қарағанды, Жезқазған аймақтарындағы филиалдарында тапсырыс толассыз. Жезқазғандағы филиалдың цехына келіп түсетін тапсырыстарды уақытылы орындауда тігін цехының жұмысында тоқтау жоқ. 110 адамнан құралған ұжымдағы қыз-келіншектердің қолынан шыққан әр үлгідегі киімдер, тоқыма өнімдері көздің жауын алады.
Тігін және тоқыма өнімдерін сапалы әрі стандартқа сай тігу мақсатында М10 тігу жабдығы сатып алыныпты. Бұл тігін және тоқыма өнеркәсібінде тоқыма материалдарын жоғары дәлдікпен кесуге арналған автоматтандырылған жабдықтың бір түрі. Оның артықшылығы сол тігін үдерісінде жоғарғы дәлдікті, өнімділікті, маталардың әртүрлілігіне қарай тігу жүйесі қамтылған. Сонымен қатар, көп қабатты тігістерді де сапалы тігуге қол жеткізеді.
«Ютария LTD» ЖШС Бас директорының орынбасары Тұрсынай Ибадатованың айтуынша, бұл тігін құралы жұмыс күшін азайтып, жаңа заманауи технологиялармен әр үлгіде киім тігуге ыңғайлы. Сапалы өнім өндіріп отырған кәсіпорынның алдағы жоспарларында тігін жүйесін заманауи жүйелерге негіздеу жолға қойылған. Жеңіл өнеркәсіп қызметкерлерінің мерекесіне осындай табыспен жетіп отырған «Ютария LTD» ЖШС-нің бағындырар белесі әлі алда екеніне күмән жоқ.
