«Қазақмыс» корпорациясының Қарағанды өндірістік аймағындағы «Нұрқазған» кеніші Кенші мен байытушы күніне толайым табыспен жетті. Кеніш директоры мереке қарсаңында Мемлекет басшысының Жарлығымен ІІІ дәрежелі «Еңбек даңқы» орденімен марапатталды. Бұл марапат Мұқан жалғасұлының тау-кен саласындағы еңбегіне берілген оң баға. Осы қуаныштың легін кеніш озаттары жалғады.
Кеніштегі «КәсіпҚорған» кәсіподағы комитетінің төрағасы Айбын Аранғазиновтың
ұйымдастыруымен еңбек озаттарына арналған ұлықтау жиыны өтті. Оған Бұқар жырау ауданының әкімі Ерлан Құсайынов, «КәсіпҚорған» кәсіподағы қарағанды филиалының төрағасы Мадияр Қалиев қатысты.
Аудан басшысы «Нұрқазған» кеншілерінің еңбектегі жетістіктеріне ризашылығын білдіре келіп, кеніш директоры Мұқан Жалғасұлын мемлекеттік наградасымен құттықтады. Кәсіподақ ұйымының ұсынысымен мерекеде үңгілеу учаскесінің үңгілеушілер бригадирі Нұржан Аяшов пен дизельдік учаскенің тиеу-жеткізу машинисі Қанат Мырзабаев І дәрежелі «Кенші даңқы» төсбелгісін омырауларына тақты. Осылайша, «Нұрқазған» кенішінен қос бірдей «Кенші даңқы» төсбелгісінің толық иегерлері шықты. ІІІ дәрежелі «Кенші даңқы» төсбелгісі кен өндіру учаскесінің бұрғылаушысы Жасұлан Кәдікешке табысталды.
Мұнан бөлек, озаттарға «Қазақмыс» Холдинг» ЖШС Директорлар кеңесі төрағасының, «Қазақмыс» корпорациясы» ЖШС Басқарма төрағасының Құрмет грамоталары, «КәсіпҚорған» кәсіподағының «Еңбек озаты» төсбелгілері тапсырылды.
Мерекелік шара аясында «КәсіпҚорған» кәсіподағы комитеті ұйымдастырған спорттық жарыстың жеңімпаздары да марапатталды. Комитет төрағасы Айбын Арынғазинов ұжым арасында мерекеден 10 күн бұрын спорттық шараларды бастап кеткен болатын. Қол күрес, арқан тарту, кір тасын көтеру, қазақша күрес, шағын футбол сынды ойындардан өткен жарыстың үздіктеріне ұйым атынан құрмет көрсетілді.
Қорыта айтқанда, нұрқазғандық кеншілер төл мерекелерін сән-салтанатпен қарсы алды.
