Тамыздың бірінші жексенбісінде атап өтілген көлік саласы қызметкерлерінің кәсіби мерекесінде өндірістік нысандардағы «КәсіпҚорған» кәсіподағы комитеті сала майталмандарына құрмет көрсетті.
Жезқазған мыс қорыту зауытындағы «КәсіпҚорған» кәсіподағы комитеті мен “Jastar Bolashaq” Жастар одағы өндіріс ошағындағы көлік цехының ұжымын кәсіби мерекелерімен құттықтап, бірқатар еңбек озаттарын марапаттады.
Комитет төрағасы Ардақ Ақылбекова цехтың еңбеккерлеріне жылы лебізін білдіріп, түсті және қара металлургия саласындағы көлік қызметінің маңызды екенін атап айтты.
Мұндай құрмет Жезқазған кен байыту фабрикасында да көрініс тапты. Ондағы «КәсіпҚорған» кәсіподақ комитеті төрағасының орынбасары Қарлыға Қозыбаева автокөлік цехының бір топ жұмыскерін, өндіріс озатын төл мерекелерімен құттықтап, Құрмет грамоталарын мен ақшалай сыйақы тапсырды.
Бағдат ҚАЗКЕНОВ.
