«Kazakhmys Smelting» ЖШС Балқаш мыс балқыту заводында Ванюков пешінің 40 жылдық мерейтойы атап өтілді.
Бүгінде Ванюков пеші мықты ғылыми мектеп пен инженерлік инновациялардың нәтижесіне айналды. Мерейтой заводта айшықты шаралармен ұштасты. Атап айтқанда, мыс балқыту цехы еңбеккерлерінің арасында үстел теннисі, бильярд, футбол, волейбол, садақ ату сынды спорт түрлерінен спартакиада ұйымдастырылды.
Жеңімпаздар мен белсенді қатысушылар бағалы сыйлықтармен және ақшалай ынталандырылды.
Қырықжылдық мерейтой салтанатты жиынға ұласты. Жиында заводтың 25 қызметкеріне марапат табысталды. 40-тан астам маман ҚР Индустрия және құрылыс министрлігінің мемлекеттік наградаларымен, «Еңбек Даңқы», «Еңбек ардагері» төсбелгілерімен және «Қазақмыс» компаниясы басшылығының, «Amanat» партиясының, кәсіподақтың Алғыс хаттарымен марапатталды.
Мерекені атап өту шеңберінде балқаш мыс балқыту заводының тарихы, металлургтердің еңбегі және мыс балқыту үдерісінің ерекшеліктері туралы жазылған кітаптың таныстырылымы өтті. Оның авторы– Балқаш мыс балқыту заводының балқытушысы, еңбек ардагері Қабдырахман Есембеков.
Кітап қонақтарға естелік сый ретінде табысталды.
