Қасиетті Құрбан айт – ислам әлемінің ең ұлық мерекелерінің бірі. Бұл күн – Алла Тағаланың разылығы үшін құрбан шалу арқылы тақуалықты арттырып, қоғамдағы бауырмалдық пен қайырымдылықты ұлықтар мейрам.
Құрбан айт Ибраһим (ғ.с.) пайғамбар мен ұлы Исмайылдың (ғ.с.) оқиғасымен тығыз байланысты. Бұл – Алланың бұйрығына толықтай бойсұну мен иманның биік үлгісі. Ибраһим (ғ.с.) пайғамбар Алланың әмірін бұлжытпай орындауға ниет білдіріп, ұлын құрбан етуге дайын болды. Сол кезде Алла Тағала оған аспаннан қошқар жіберіп, үлкен сынақтан өткенін мәлімдеді. Осы оқиғаның ізімен мұсылмандар Құрбан айтта мал шалып, Жаратушыға жақындай түседі.
Құрбан айт – тек мал шалу ғана емес. Бұл – жүрек тазалығы, ықылас пен ниеттің шынайылығы, мұқтажды бөлісу, көрші-қолаңды, ағайын-туысты еске алу сәті. Бұл күндері айт намазына жиналған жамағат бір-бірімен амандасып, жақсы тілектер айтып, араздасқандар татуласады. Қоғамдағы бірлік пен бауырмашылдық осы күндері ерекше сезіледі.
Құрбандыққа шалынатын мал – діннің ұлық бұйрығы. Бірақ Аллаға малдың еті де, қаны да емес, пенденің жүрегіндегі тақуалығы мен шүкірлігі жетеді. Бұл туралы Құранда: «Олардың еттері де, қандары да Аллаға бармайды. Бірақ Аллаға сендердің тақуалықтарың ғана жетеді…» (Құран, Хаж сүресі, 37-аят)
Бүгінде еліміздің әр өңірінде Құрбан айт кең көлемде аталып өтеді. Мешіттерде айт намаздары оқылып, мұқтаж жандарға құрбандық еті тараты-
лып, игі істер атқарылады. Құрбан айт – татулықтың, діни бірегейліктің, рухани кемелдіктің белгісі.
Ендеше, бұл қасиетті күндерде тек құрбан шалу емес, өзімізді де рухани тұрғыда тәрбиелеп, иманымызды күшейтіп, бауырларымызға мейіріммен қарауға тырысайық. Құрбан айт – әр мұсылманның жүрегіне қуаныш, отбасына береке, қоғамға бірлік алып келсін!
Құрбан айт құтты болсын!
Бейбіт Жансарин,
Ұлытау облысының бас имамы.
