Астана күні мен Ұлттық домбыра күні Жезқазғанда кең көлемде аталып өтті. Концерттік бағдарлама ұйымдастырылып, тұрғындарға мерекелік көңіл-күй сыйлады.
Мереке салтанаты таяуда ғана ашылған Қаныш Сәтбаев алаңында ашылды. Алаңда «Күй арқауы – Астана» атты мерекелік концерт өтті. Концерттік бағдарламаға ел сүйсіне қол соқты.
– Осындай мерекелік көңіл күй сыйлаған облыстық, қалалық әкімдіктегі азаматтарына рақметімізді айтамыз. Халықта осындай әрқашан мерекелік тойлар болып тұрсын! Қазақтың қасиетті домбыра күні құтты болсын, – дейді ағынан жарылған қала тұрғыны Ақгүл Сырлыбаева.
Концерттік бағдарлама шын мәнінде қос мерекенің қошеметін көрсетті. Домбырашылар мен жетігеншілер мерекенің мәнін әспеттей түсті. Сахнада № 13 жалпы білім беретін мектебінің «Домбыра дастан» домбырашылар ансамблі мен Тайжан Қалмағанбетов атындағы Жезқазған филармониясының «Алтын орда» ансамблі бірігіп «Балбырауын» күйін төгілтті Ал, ҚР-ның еңбек сіңірген әртісі Серік Оспанов «Дариға домбырамды берші маған» деп әннен шашу шашты.
– Ұлттық домбырамызды ұлықтап жатырмыз жыл сайын. Өте тамаша мереке деп ойлаймын. Салт-дәстүріміз көрініс тапқан күн бұл, – дейді ҚР еңбек сіңірген әртісі Серік Оспанов.
Мерекелік шара ән-жырмен өріліп отырды. Биыл аталған қос мереке осылайша өз деңгейінде атап өтіліп, тұрғындарды ерекше әсерге бөледі.
Гүлім МАРАТҚЫЗЫ.
