Қазақстан Республикасы Өнеркәсіп және құрылыс министрлігі мен «Қазақмыс» корпорациясы» ЖШС «Жұмысшы мамандықтарының жылы» аясында республикалық БАҚ өкілдеріне баспасөз турын ұйымдастырды.
Тур аясында отызға жуық БАҚ өкілі «Қазақмыс» корпорациясының Жезқазған өндірістік аймағындағы шахталар мен завод, фабрикасында болды. Әріптестердің алғаш болып қадам басқан нысаны Оңтүстік Жезқазған кеніші болды. Мұнда БАҚ өкілдерін «Қазақмыс» корпорациясы» ЖШС Басқарма төрағасының өндіріс жөніндегі орынбасары Саят Бакиров қарсы алып, өңірдегі тау-кен саласының бүгінгі ахуалы жайында баяндады.
Саят Шарафиденұлы ақпарат айдынының мамандарымен № 65 шахтаға түсіп, кен алудың үдерісін көрсетті. Мұнан кейін топ 2016 жылы кен игерілу үдерісі басталған «Жыланды» кенішіне бет алды. Онда журналистер қауымы кеншілермен сұхбаттасып, кеншінің бір күндік жұмысының барысымен танысты. Келген меймандарға 2021 жылы пайдаланылуға берілген «Жыланды» кенішінің әкімшілік-тұрмыстық кешені ерекше әсер қалдырды.
Баспасөз турының келесі күнінде БАҚ өкілдері Жезқазған байыту фабрикасы мен Жезқазған мыс қорыту заводында болды. Байыту фабрикасында кенді ұсақтау үдерісі көрсетілді. БАҚ өкілдері мыс қорыту заводында 1500 градуста балқыма алудың жолдарын көрді. Сонымен қатар, олар «Қазақмыс» корпорациясының Ұлытау облысына әлеуметтік серіктестік шеңберінде салып берген нысандарында болды.
Мысты өлкеге келген БАҚ өкілдерінің сапары «Жомарт» кенішіне барумен түйінделді.
