«Қазақмыс» корпорациясы» мен ҚР үстел теннисі федерациясы өңірлерде спортты дамыту үшін өзара ынтымақтастық туралы меморандумға қол қойған болатын.
Маңызы зор мәміле аясында өңіріміздегі «Жігер» дене шынықтыру сауықтыру кешенінде үстел теннисінен Қазақстан жасөспірімдер құрамасының аға бапкері Евгений Тимченко келіп, шеберлік сабағын өткізді.
Қуатты компания – өңірдегі спорт саласының қуатын арттыруға да үлес қосып келеді. Меморандум аясында халық игілігі үшін «Жігер»спорт кешені пайдалануға берілген еді. Енді міне, шеберлік сабақтарын өткізуге күш салып жатыр. Қазақстан жасөспірімдер құрамасының аға бапкері Евгений Тимоченконың айтуынша, қазір федерация үстел теннисін кеңінен насихаттау, бұқаралық спортты дамыту және қазақстандық спортшылардың шеберлігін арттыру бағытында ауқымды жұмыс жүргізіп жатыр.
– Осы орайда, Ұлытау облысы спортшыларының шеберлігін көтеру үшін мені оқу-жаттығу жиынын өткізуге жіберді. Бұл жиынға спорт мектептерінің балалары қатысуда. Жаттығу бағдарламасы аясында жаттықтырушыларға арналған семинар да өтті. Онда біз жаттықтырушыларға қалай жұмыс істеу керек, қалай ойыншыларды жинақтау керек, қазіргі үстел теннисінің даму бағыттары қандай екенін үйреттік. Бұл жұмыстар өңір спортын жаңа деңгейге көтеріп, басқа облыстармен бәсекелесе алатын жағдайға жеткізу үшін қолға алынып отыр, – деді бапкер.
Шеберлік сабағына аймағымыздан қырық бестен аса жас теннисші қатысты. Жаттығу барысында қатысушылар тек тәжірибе жинап қана қоймай, кәсіби кеңестер алды. Басты мақсат – жергілікті спортшылардың шеберлігін арттырып, бұқаралық ақпарат құралдары арқылы үстел теннисін кеңінен насихаттау. Бүгінде Ұлытау облысы бойынша аға жаттықтырушы Ғалия Әбдіғаппарова жас теннисшілерді спорттың осы түріне баулып жүр. Аға жаттықтырушы «Қазақмыс» корпорациясының мұндай қолдауы үлкен көмек әрі үлкен тәжірибе екенін алға тартты.
Сондай-ақ оқыңыз
Бұдан бөлек меморандум аясында Ұлытау облысының спортшыларына арналған оқу-жаттығу жиындары, Қазақстанның еңбек сіңірген жаттықтырушыларының қатысуымен жаттықтырушыларға арналған семинар, 2016, 2020 және 2024 жылдардағы Олимпиада ойындарына қатысқан әйгілі спорт шеберлерімен бірлескен шеберлік сағаттары және басқа да іс-шаралар өткізу жоспарланған.
Гүлім МАРАТҚЫЗЫ
