«Қазақмыс» – әлеуметтік салаға баса мән беретін елдегі бірегей ірі компания. Осы тұрғыда аталған компания еліміздің бірқатар су басқан аймақтарына арнайы ауыр техника жіберді.
«Қазақмыс» компаниялар Тобы Батыс Қазақстан облысындағы су тасқынының салдарын жою үшін 14 арнайы ауыр техника аттандырды. 4 экскаватордан, 5 шөмішті тиегіштен, 4 самосвалдан және басқа да қажетті арнайы техникадан тұратын машина-көлік паркі су басудың аса қауіпті аумақтарына қызмет көрсететін болады. Бұл техникалар Жезқазған, Балқаш және Қарағандыда жұмыс істейтін «Қазақмыс» бөлімшелерінен жиналды.
Барлық техника су тасқынына қарсы іс-шараларды үйлестіру және су тасқынының салдарын жою жөніндегі республикалық штабтың уақытша иелігіне берілетін болады.
Сондай-ақ, «Қазақмыс» компаниялар Тобы тарапынан Атырау, Ақтөбе, Қостанай және Батыс Қазақстан облыстарында су тасқынынан зардап шеккендерге гуманитарлық көмек те жақын арада жіберіледі.
Айта кетейік, бұған дейін «KAZ Minerals» Тобы мен «Қазақмыс» корпорациясы» ЖШС су тасқынынан зардап шеккендерге көмек көрсету және Қазақстанның бірқатар өңірлерінде табиғи апаттың салдарын жою үшін 800 миллион теңге бөлген болатын.
«Қазақмыс» корпорациясы» ЖШС баспасөз қызметі.
