Әлемдік нарықта сары алтынмен теңесетін сапалы мыс өндіретін «Қазақмыс» компаниясы өндірістік нысандары бар өңірлерде әлеуметтік маңызды нысандар салу, дамыту сынды бағыттарға басымдық беріп келеді.
Компания Ұлытау облысы құрылғаннан бергі уақытта спорттық нысандарды жандандыруға баса көңіл бөліп отыр.
«Қазақмыс» еліміздегі кәсіби спортты белсенді түрде қолдап келеді. Салауатты өмір салтын насихаттау және жастарды спортқа бейімдеу мақсатында өңірде «CK NAMYS», «Канск» спорт кешендерін қайта жаңғыртуды қолға алды. «Канск» спорт кешенінде үлкен күрес залы ашылды. Қазіргі уақытта спорт кешеніне қосымша құрылыс жұмыстары жүргізілуде.
Мектептерде командалық спорт түрлерінен қосымша сабақтар ұйымдастырылып, қажетті құрал-жабдықтармен қамтамасыз етілген. Компанияның қолдауымен мысты шаһарда 320 орындық денешынықтыру-сауықтыру кешені салынуда. Оның құрылысы қазан айында аяқталады деп күтілуде.
«Қазақмыс» 2022 жылы құрылған «Ұлытау» кәсіби футбол клубын да қаржыландырады. Клуб қазір бірінші лигада ойын көрсетіп жүр. Сонымен қатар, Жезқазған қаласында Шахмат академиясының, Сәтбаев қаласы мен Жаңаарқа ауданының Ералиев ауылында ангар типті спорт кешендерінің құрылысы жүзеге асуда.
Жалпы алғанда, «Қазақмыс» аймақтарда спортты дамытуда ірі жобаларға қолдау көрсете отырып, халықтың салауатты өмір салтын ұстануына негіз қалауда. Компанияның осы бағыттағы еңбегі жоғары бағаланып, ол «Денсаулық капиталы» атты Бірінші Ұлттық форумында «Кәсіби спортты дамытуға қосқан үлесі үшін» номинациясын да иеленген болатын.
Бағдат ҚАЗКЕНОВ.
