Сәрсенбі күні Астана қаласында он үшінші мәрте «Kiosh» қазақстандық халықаралық еңбекті қорғау және өнеркәсіптік қауіпсіздік жөніндегі конференция мен көрме бастауын алды.
28 – 30 мамыр аралығындағы жиында өндірістік қауіпсіздікті басқарудың заманауи қадамдары сөз болды. Конференция мен көрмеге ел аумағынан жиналған өндірістің әр саласынан мамандар мен кәсіподақ ұйымының өкілдері болды. Тау-кен, металлургия және аралас өндіріс еңбеккерлерінің «КәсіпҚорған» кәсіподағының Жезқазған, Қарағанды, Балқаш өңіріндегі өкілдері қатысты.
– Бүгінгі күні өндірістегі қауіпсіздікті нығайту, жұмысшылардың еңбек жағдайын жақсарту өзекті. Сондықтан да бұл жиын саладағы осы мәселелерді шешуге ықпал етеді деп сенеміз, – деді бізбен байланысқа шыққан конференция қатысушысы, Жезқазған мыс қорыту зауытындағы «КәсіпҚорған» кәсіподағы комитетінің төрағасы Ардақ Ақылбекова.
Айта кетейік, конференция барысында қатысушыларға қауіпсіздікті күшейтуге бағытталған дәрістер оқылып, түрлі семинар-тренингтер ұйымдастырылды. Көрмеге келушілерге жұмысшыға арналған жеке қорғаныш заттары мен өндіріске арналған киім үлгілері ұсынылды.
