Мемлекет басшысы Қасым-Жомарт Тоқаевтың тапсырмасымен еліміздің құқық қорғау жүйесінде жүргізіліп жатқан реформаның негізі полиция қызметін жаңа үлгіде жүргізу болып отыр. Бұл ретте Президент полиция мен азаматтардың арасында тығыз қарым-қатынас орнатуды бірінші кезектегі міндетке айналдыруды тапсырып, «Халыққа жақын полиция» қағидасын ұсынды.
Қазір еліміздің құқық қорғау жүйесіне түбегейлі реформа жасау көзделуде. Бұл туралы Мемлекет басшысы Қасым-Жомарт Тоқаев: «…Алдымызда ауқымды жұмыстар тұр. Басты міндет – полицияның ұстанымын өзгертіп, жұмыстың жаңа үлгісіне көшу. Мұндағы негізгі мақсат – азаматтармен жұмыс барысында тығыз қарым-қатынас орнатып, қылмыстың алдын алу» деп атап көрсеткен еді.
Азаматтардың құқын қорғау және олардың қауіпсіздігін қамтамасыз ету – полициясының негізгі міндеті.
Бүгінгі таңда тек қылмыспен күресу ғана емес, адамдардың қауіпсіздігін арттыру, полиция мен тұрғындардың арасындағы тығыз байланысқа көбірек мән берілуі керек.
Ел көлемінде «Қауіпсіз қала» жобасы қолға алынғаны белгілі. Көшелерді қауіпсіздендіру мақсатында камералар орнату жұмыстары қарқынды жүргізілуде. Бұл бағыттағы шаралар Ұлытау облысында да байқалады. Мұндай игі істер көшеде орын алатын түрлі қылмыстарды ауыздықтауда маңызды рөл атқарады.
Дейтұрғанмен қоғамдағы зорлық-зомбылық, наркобизнесі мен педофилия өршіп тұрғаны жасырын емес. Ел көлемінде педофилдердің құрбаны болған бүлдіршіндердің санының өсуі де баршаны ойландыратын жағдай. Әсіресе, зорлық-зомбылық пен кәмілеттік жасқа жетпеген балаларға жасалған қастандықтың жиі белең алуы қоғамда полиция қызметінің жауапкершілігін арттыруды талап етеді.
Президенттің құқық қорғау саласын реформалаудағы басты қағидаты елдегі қылмыстың алдын алуға бағытталып отырғандықтан елімізде күйіп тұрған қылмыстардың бетін қайтару тікелей ішкі істер органдары қызметкерлерінің міндеті. «Қауіпсіз қала» жобасы қылмыстың азаюына барынша ықпал етіп, халықтың қауіпсіз қоғамда өмір сүруіне негіз болады деп топшалайды мамандар.
Әділетте мемлекет қалыптастыру – құқық қорғау саласының барынша қоғам қауіпсіздігіне, халықтың бас амандығын қорғау жолындағы жүйелі жұмыстарынан көрінуі тиіс. Міне, сонда ғана мемлекетімізде қылмыстың саны азайып, халық өзін қауіпсіз сезінеді.
Бағдат ҚАЗКЕНОВ.
