Мемлекет басшысы Қасым-Жомарт Тоқаев Қазақстан халқына Жолдауында техникалық және кәсіби білім беру жүйесін реформалау қажеттігіне назар аудара келіп, 2025 жылды Жұмысшы мамандықтары жылы деп жариялады. Осы орайда тарихы Жезқазған қаласының өсіп-өркендеу жолымен тамырлас өрбіген «Тау-кен металлургиялық колледжі» коммуналдық мемлекеттік мекемесінің бүгінгі тыныс-тіршілігімен танысуды жөн көрдік.
«Тау-кен металлургиялық колледжі» КММ 1955 жылдың 2 қазанында Қ. И. Сәтбаев атындағы Ленин орденді Жезқазған кен-металлургия комбинатына мамандар даярлау мақсатында құрылып, әуелде № 13 техникалық училищесі деп аталған болатын. Содан бергі уақыт ішінде талай құрылымдық өзгерістерді бастан өткергенімен, оқу орны қала құрушы саланың кәсіпорындарына кәсіби жұмысшы мамандарын даярлау бағытын өзгерткен емес. Мысты шаhармен қатар қарыштап, кәсіби білім берудің өміршең ұясына айналған оқу орны алдағы жылы 70 жылдығын атап өтпекші. Қазірде колледжге директордың міндетін атқарушы Гүлнар Кенбейілова басшылық жасауда. Мұнда тұрақты және жоғары білікті оқытушылар мен оқу-өндірістік шеберлерінің ұжымы қалыптасқан. Оқушыларға сапалы білім беру жолында 22 оқытушы еңбек етуде.
Жұмысшы мамандығының ұясында бүгінде 380 бала оқиды. Биылғы жылы 149 жас түлек колледждегі оқуын бітіріп, үлкен өмір жолына жолдама алды. Мұнда келген жастар «Электр жабдықтары», «Жүк машиналары мен транспортерлар», «Токарь ісі», «Дәнекерлеу ісі» мамандықтары бойынша оқып, электрослесарь, электромонтер, кран машинисі, токарь, электр-газбен дәнекерлеуші біліктілігін алып шығады. Мәселен, түсті металлургия саласында үлкен сұранысқа ие токарь мамандығын бұл өңірде осы оқу орны ғана дайындайды екен. Биыл «Түсті металдар металлургиясы» деген жаңа мамандық бөлімі ашылып, балқытушы және техник-металлург біліктілігі бойынша мамандар даярлауды қолға алыпты. Бұдан басқа да бірталай кәсіптік мамандықтар бойынша оқыту жолға қойылған.
Сондай-ақ оқыңыз
Оқу корпусында 22 кабинет, спорт залы, мәжіліс және конференц залдары бар. Қаладағы жастардың іс-шараларының көбісі осында өтетін көрінеді. Оқу кабинеттері инновациялық құрал-жабдықтармен қамтылған. Өндірістік сабақтар өткізетін колледждің 4 шеберханасы барлық талаптарға сай. Мәселен, токарь цехы 15 станокпен қамтылған, 12 орындық дәнекерлеу цехы, сондай-ақ, жақсы жабдықталған электрлік және токарьлық зертханалар қаланың басқа жерлерінде жоқ десе болады. Биылғы жылы жатақхана мен асхана күрделі жөндеуден өткізіліп, жиhаздары мен жабдықтары толықтай жаңартылыпты. Жатақхана жобалық қуаты бойынша 120 адамды орналастыра алады. Қазірде жатып оқитын бала санының аздығына байланысты жасөспірімдер үйі мен психологиялық көмек көрсету орталығы осында орналасатын болыпты.
– Колледжімізде оқушы-студенттердің кәсіби мамандықты сапалы әрі жетік меңгеруіне барынша жағдай жасалған. Токарь ісі, металлургия, автомобиль ісі жөніндегі зертханаларда балалар тәжірибе жасап дайындалады. Шеберханадағы металлургиялық пештер арқылы балқытушы мамандығының алғашқы әліппесін үйренеді. Барлық студенттер кәсіпорындар базасында өндірістік тәжірибеден өту үшін міндетті түрде тиісті орындармен қамтамасыз етіледі. Үздік оқитын жастар бірден жұмысқа шақырылып, олардың жұмысқа орналасуы оң шешімін табуда. «Қазақмыс» корпорациясына қарасты іргелі кәсіпорындармен әріптестік туралы өзара келісім Меморандумдары студенттердің өндірістік тәжірибеден өтуін жоспарлауға және оларды еңбекпен қамтуға жақсы мүмкіндік беруде. Колледжбен «Жезқазғантүстімет» АҚ, «ЖСҚК», «Жез.РЭК» АҚ, «Maker» ЖШС, Строймехсервис,«Kazakhmys Distribution» ЖШС екі жақтың мүддесіне сай келісім шарттар жасасқан. Соның нәтижесінде оқу бітірген түлектеріміздің 70 % осы кәсіпорындарға жұмысқа орналасып жүр. Оларға білікті, тәжірибелі ұстаздар сабақ береді. Колледж оқытушыларының зерттеуші, сарапшы дәрежелері бойынша жаңаша әдісті меңгергенін де атап өтуге болады. Арамызда Білім беру саласының құрметті қызметкері Нина Михайловна Мишина бастаған тәжірибелі ұстаздар қатары аз емес, – дейді директордың оқу ісі жөніндегі орынбасары, Білім беру саласының құрметті қызметкері Жанаргүл Бұлақбаева.
Жыл сайын өтетін жұмысшы мамандықтарының чемпионатына облыс атынан қатысатын колледж студенттері «Ең мықты токарь», «Ең үздік дәнекерлеуші» номинациялары бойынша жеңімпаз атанып, жүлделі орынға ие болып жүр. Республикалық «World Skills Kazakhstaan» чемпионатында және облыстық чемпионатта 25 жыл еңбек өтілі бар педагог-сарапшы Валерий Лаубганның шәкірттері үнемі топ жарып, жүлдегерлер қатарынан орын алуда. Мұның барлығы балалардың біліммен қатар кәсіби біліктілікке қызығушылықтарын арттыруға оң ықпалын тигізуде.
Жұмыстың жаманы жоқ, кез келген еңбек қадірлі деп санайды халқымыз. Солай десек те, бүгінде заман талабына сай жұмысшы мамандықтарын дәріптеу арқылы қоғамда еңбекқор және нағыз маман болу идеясы кеңінен насихатталуда. Осы тұрғыдан қарағанда, Жезқазған Тау-кен металлургиялық колледжінің мыс балқытып, кен қазған өңір сипатына толық сай келетін, өскелең талапқа лайықты оқу орны екенін айқын аңғардық.
Амандық РАХҰЛЫ.
