Ұлытау облысына жұмыс сапары барысында ҚР Премьер-министрі Әлихан Смайылов Жезқазған қаласының бас жоспарымен танысты.
Бас жоспарға сәйкес Жезқазған қаласында әлеуметтік, спорттық нысандар бой көтереді. Жезқазған қаласы қарқынды дамиды. Әлеуметтік мәселелер шешімін тауып, халықтың әл-ауқаты артады. Аймақ басшысы Берік Әбдіғалиұлы қаланың даму жоспарын іске асыру барысында осы бағытта күтілер оң өзгерістерді Әлихан Смайыловқа жан-жақты таныстырды. Тұрғын-үйлердің 33 пайызы ескірген. Қазір баспаналарды жаңарту бағдарламасы жүзеге асырылып жатыр. 2023-2025 жылдары қаланың жаңа ауданында көп қабатты 11 тұрғынүй салу жоспарланған. Қазақстанның Ұлттық банкі филиалы, әкімшілік, Ұлытау облыстық соты, прокуратура ғимараттары жаңа ауданда бой көтереді. «Қазақмыс» корпорациясы мен Ұлытау облысының әкімдігі жасасқан меморандумға сәйкес, балабақша құрылысы басталды. Бұдан бөлек, меморандум аясында қаланың жағалауына абаттандыру жұмыстары жүргізіледі.
Үкімет басшысы өңірді дамыту жөніндегі ұсыныстарды қолдайтынын айтты.Ең алдымен тиісті инфрақұрылым желілерін тарту керектігін еске салды. Ауыз су мәселесі де қолдау тапты.
Үкімет пен облыс әкімдігі барлық мәселелерді бірлесіп шешеміз деді. Ал, қаланы дамытуда қолдау білдіріп жатқан «Қазақмыс» корпорациясына Премьер-министр алғыс білдірді.
Гүлім МАРАТҚЫЗЫ.
