15 мамырда атап өтілген халықаралық Отбасы күнінде жезқазғандық жұпқа отау құру бақыты бұйырыпты. Оларға неке куәлігі салтанатты түрде табысталды.
Ахмет Ишан Оразайұлы атындағы мешітте Әділжан Әбілғазиев пен Батпа Халық некелерін қиды. Әділжан ішкі істер органдарында қызмет атқарса, Батпа жас ұрпаққа білім мен тәрбие беріп жүрген ұстаз. Мешітте өткен рәсімде жас жұбайлар өмірлік серттерін беріп, шаңырақ көтерді. Ең бастысы Әділжан құсын қолына қондырғанына ерекше қуанышты.
Жас отаудың отағасы Әділжан Әбілғазиев:
– Бүгін біз үшін тарихи сәт. Ерекше әсердемін. Толқып та, қуанып та тұрдық. Енді алдағы уақытта ата-анамыз разы болатындай қызмет жасаймыз, – деді. Жастардың қуанышын бөлісуге келгендердің де қарасы қалың. Қала әкімдігінің өкілдері қатысып, жас жұбайларға ақ тілектерін жеткізді. Ақ жаулықты әжелер шашу шашып, бата берді. Көпбалалы ана жас келіннің иығына ақ орамал жауып, ұлттық дәстүрді ұлықтады.
Осындай тағлымды шаралар отбасы мәртебесін көтеріп, ортақ құндылықтарды дәріптеуге негіз болатын анық.
