Жезқазған қаласында Болат Өтемұратов қорының қолдауымен заманауи Оқушылар сарайының құрылысы басталды. Жалпы аумағы 2600 шаршы метрді құрайтын ғимарат 250 балаға арналған.
Іргетасын қалау рәсіміне Ұлытау облысының әкімі Дастан Рыспеков, Қордың директоры Айнұр Карбозова және Қамқоршылық кеңесінің төрағасы Алмаз Шарман қатысты.
– Жезқазған қаласының батыс ауданы даму үстінде. Бұл аумақта әлеуметтік нысандар бой көтеріп, қолайлы орта қалыптаспақ. Соның бірі – осы Оқушылар сарайы. Жобаға қолдау білдірген қор басшылығына алғысымыз шексіз, – деді облыс әкімі.
Жаңа сарайда акт залы, медиаорталық, хореография және жекпе-жек залдары, фотостудия, музыкалық кабинеттер мен сенсорлық бөлмелер болады. Сонымен бірге цифрлық өнер, робототехника, жаратылыстану және нақты ғылымдарға арналған STEM-орталық ашылады.
Көршілес аумақта спорт және ойын алаңдары, демалыс аймақтары, автотұрақ пен көгалдандыру қарастырылады. Нысан толықтай мүмкіндігі шектеулі азаматтарға бейімделіп, қауіпсіздік пен энергия тиімділігі талаптарына сай салынбақ. Құрылыстың 2026 жылдың маусымында аяқталуы жоспарланып отыр.
