Ұлытау облысының орталығына жұмыс сапарымен ҚР Цифрлық даму, инновациялар және аэроғарыш өнеркәсібі вице-министрі Ростислав Коняшкин келді.
Құрметті мейманның Жезқазғандағы жұмыс сапары «Аманат» партиясының Ұлытау облыстық филиалы ғимаратында халықпен жүздесуден басталды. Оған облыс әкімінің орынбасары Ұлантай Үсенов пен халық қалаулылары және қоғам белсенділері арнайы қатысты. Вице-министр алдымен саладағы оң өзгерістерге тоқталып өтті.
– Менің ойымша қазір кез келген азамат көрсетілетін қызмет түрлерін максималды түрде онлайн форматта алғысы келеді. Бұл бағытта министрлік тарапынан бірнеше жобалар қолға алынған. Егов арқылы құжаттарды цифрлы түрде алу жұмыстары да жүйелі жолға қойылған, – деді Ростислав Коняшкин кездесу барысында.
Әрине, атқарылып жатқан жұмыстар аз емес. Бірақ, бұл ретте шалғайдағы ауылдар да сапалы байланыс желісімен қамтылу қажет. Жоспар бойынша 2027 жылға дейін Ұлытау облысындағы барлық елді мекен интернет желісіне толықтай қосылмақ. Ал, халыққа қызмет көрсету орталықтарындағы қызмет түрлерінің 92 пайызға жуығы цифрландырылған. Алда, аталған бағыттағы шаралар әрі қарай жалғаспақ.
– Үкіметтің басты мақсаты алдағы уақытта осы жүйенің көлемін көбейту. Басқа да жүйелерді іске қосу, – деді кездесуде сөз алған Ұлытау облысы әкімінің орынбасары Ұлантай Үсенов.
Халықпен кездесуден кейін вице-министр БАҚ өкілдеріне брифинг өткізіп, азаматтарды жеке мәселелері бойынша қабылдады. Көтерілген сұрақтар бойынша жергілікті билік өкілдерімен бірлесе жұмыс істейтіндігін айтты.
Гүлім МАРАТҚЫЗЫ.
