Әр істің жақсы жағын көруге құмартып тұрамын. Қызмет барысында өндіріс ошағын аралап, еңбек адамдарымен танысып, тілдесіп, ерекше қасиеттерін байқаймын.
Жақында Жезқазған байыту фабрикасында болдым. Кәсіпорын басшысы Мұрат Бөрібаевтың еңбексүйгіштігі, елге жанашырлығы, уәдеге беріктігі, жаңашылдыққа ұмтылысы, жоғары жауапкершілігі сияқты қасиеттеріне бұрыннан тәнті болатынмын. Жас болса да бас болып отырған азаматтың қарамағындағыларға да сондай риза болып қайттым.
№ 1 бас корпустың бастығы Нұрғали Есілбаевпен жұмыс барысында таныстық. Корпустың еңселі ғимаратына жақындағанда байқағаным: қазақ ғұламаларының ғибратты сөзі жазылған тартпалар мен текшелер. Шәкәрім Құдайбердіұлының мына сөзі көзге бірден түсті: «Сөзіңді түзе – әдетіңе айналады. Әдетің – мінезіңе айналады. Мінезің – сенің тағдырың». Осындай нақыл сөз жұмысшының еңбегіне де, тағдыр жолына да сабақ болары сөзсіз.
Ғимараттың ашық алаңқайына қызанақ, картоп, тағыбасқа да көкөніс егілген. Жеміс ағаштарынан көзіме жайқалып өсіп тұрған қарақат пен шие түсті. Көз тартатын әсем гүлдер, төңірегіне салқын ауа таратқан субұрқақ төңірекке ерекше көрік беріп тұр. «Жұмыстан шаршап шыққанда осындай гүлзар, бау-бақша маңында отырсаң, кәдімгідей тынығып қаласың» дейді менің жаңа таныстарым. Көкөніс пен жеміс піскенде ұжым ерекше мерекелік көңіл күйде жүреді. Қаланың көпқабатты үйінде тұратын адамдардың бау-бақшамен, табиғатпен осылайша үйлесім табуы ерекше релаксация екені сөзсіз.
Осы алаңқайға заманауи спорт жабдықтары, тренажерлар қойылыпты, бұл да Нұрғалиаға бастаған ұжымның ортақ жемісі. Жалпы бұл ұжымның спортқа етене жақындығы, тек еңбекте ғана емес, өнерде де ұйымшыл екені жұртшылыққа жақсы таныс. Ұжымның «Сәулем-ай» тобы ұлттық салт-дәстүрді насихаттап, өнерімен танылуда. «Сегіз қырлы, бір сырлы» ұжым бірлігі арқасында басқаларға үлгі.
Ғимараттың ішіндегі еңбек ардагерлері галереясына зейнеткерлікке шыққан әріптестерінің суретін енгізіп, іліп қойыпты. Бұл еңбек адамына деген үлкен құрмет, кейінгі жастарға өнеге деп білемін.
Мереке МЫРЗАБЕКОВА.
