28 маусым – Бұқаралық ақпарат құралдары қызметкерлерінің кәсіби мерекесіне орай Ұлытау облысының орталығы – Жезқазған қаласында екінші мәрте аймақ басшысының журналистерге тағайындаған «Ūlar» сыйлығы табысталды.
Өңір журналистикасының дамуына үлес қосқан аға буын мен кейінгі толқын басқосқан жиында БАҚ өкілдеріне деген ыстық ықыласын Ұлытау облысы әкімінің орынбасары Ұлантай Үсенов, Ұлытау облысы мәслихатының төрағасы Бауыржан Шыңғысов жеткізіп, сый-сияпат тапсырды.
Оның қатарында «Мысты өңір» газетінің тілшісі Шахмұрат Ибадатов та бар. Журналистика саласындағы еңбегі үшін Шахмұрат Ибадатов Ұлытау облысы әкімінің Алғыс хатымен марапатталды.
Он үш аталым бойынша облыс әкімінің «Ūlar» сыйлығы өз иелерін тапты. «Мысты өңір» газетінің ұжымынан үш бірдей тілшінің еңбегі жанып, марапатқа лайық деп танылды.
«Ұлытау облысы журналистикасын дамытуға қосқан үлесі үшін» номинациясы мен 1 млн. теңге «Құрмет» орденінің және «Ақпарат саласының үздігі» төсбелгісінің иегері, Қазақстанның Құрметті журналисі Амандық Рахұлына бұйырса, «Өндірістік тақырыпты үздік жариялағаны үшін» аталымы мен 500 мың теңгені газеттің аға тілшісі Бағдат Қазкенов иеленді.
«Ūlar» сыйлығының «Белсенді өмірлік ұстанымы үшін» номинациясы мен аймағымызда жазба және тележурналистиканың дамуында өзіндік ізі қалған публицист, Әлем халықтары Жазушылары одағының мүшесі атанған Тоғанбай қажы Құлманов атындағы сыйақыны тілшіміз Гүлім Маратқызы еншіледі. Айта кетейік, Тоғанбай қажы Құлманов атындағы бұл сыйақы биыл алғаш рет шәкірттерінің ұйымдастыруымен табысталып отыр.
«Ūlar» сыйлығында топ жарған үш әріптесімізді жетістіктерімен құттықтай отырып, шығармашылық табыстар тілейміз.
Ай НУРИ.
