Ұлттық мереке – Республика күнін Ұлытау облысының жұртшылығы да бар сән-салтанатымен атап өтті. Жезқазған қаласындағы Халықтар достығы мен мәдениеті үйінде салтанатты жиын өткізіліп, өңірдің дамуына үлес қосып келе жатқан азаматтар марапатталды.
Салтанатқа жиналған жұртшылық әуелі өңіріміздің әр аймағынан келген көрме-жәрмеңкені тамашалады. Бұдан соң облыс әкімі Дастан Рыспеков жиналғандарды ұлттық мерекемен құттықтап, арнайы наградаларды табыс етті. Облыстың өсіп-өркендеуіне үлес қосып келе жатқан бірқатар азаматтар ҚР Президентінің Жарлығымен «Құрмет», «Парасат», «Еңбек даңқы», «Ерен еңбегі үшін», «Шапағат» орден-медальдарымен марапатталды. Солардың қатарында газетіміздің жауапты хатшысы Ізтай Белгібайұлы «Ерен еңбегі үшін» медаліне ие болды.
Салтанатта, сондай-ақ «Қазақстанның еңбек сіңірген қайраткері», «Ұлытау облысының Құрметті азаматы» атағы мен алтын құрсақты аналарға «Алтын алқа» табысталды. Бірқатар азаматтар Ұлытау облысының Құрмет грамотасымен марапатталды.
Мерекелік іс-шара концерттік бағдарламамен жалғасын тапты. Кеш қонақтары, елімізге белгілі ұлытаулық азаматтар – Қыдырәлі Болманов, Қарақат Әбілдина, «Ұлытау» тобы, Қуандық Рахым жерлестерге мерекелік көңіл-күй сыйлады.
Ай НУРИ.
