Өткен жексенбіде «Жезқазған аңшылар мен балықшылар қоғамы» қоғамдық бірлестігі дәстүрлі қысқы балық аулау жарысын ұйымдастырды.
Жексенбілік таңда қармақтарын қолға алған балықшылар Кеңгір көлін бетке алды. Мұндағы жарыстың негізгі мақсаты – қала тұрғындарына таза ауада ерекше демалыс сыйлау және ұйымшылдық пен достықты нығайту. Биылғы балық аулау додасына 100-ге жуық балықшы қатысты.
Қатысушылар арасында кәсіби деңгейдегі балықшылар мен жаңадан үйреніп жүргендері де бар. Сайыс басталмас бұрын мұздағы қауіпсіздік шаралары түсіндірілді. Ережеге сай балықшылар өз шеберліктерін байқатты. Жарыс жеңімпаздары мен жүлдегерлері бағалы сыйлықтармен және арнайы дипломдармен марапатталды.
– Өте қуаныштымын. Барша қатысушыларды құттықтаймын. Жарысқа бұйыртса, келер жылы тағы қатысамын. Керемет демалыс болды, – дейді жарыс жеңімпазының бірі Иларион Хигай.
Сондай-ақ оқыңыз
Сайыс соңында қатысушылар мен көрермендер үшін түскі ас дайындалды. Самаурынның ыстық шайы ұсынылып, дәмді палау таратылды.
Гүлім МАРАТҚЫЗЫ.
