Экология және табиғи ресурстар министрі Ерлан Нысанбаев Ұлытау облысына іссапары аясында «Қазақмыс Смэлтинг» ЖШС құрамындағы Жезқазған мыс қорыту зауытында болды.
Онда министр «Қазақмыс» корпорациясының табиғи ортаны ластанудан қорғаудың тиімді жобаларымен танысты. «Қазақмыс Смэлтинг» ЖШС Бас директоры Жәнібек Байғабелов министрге өндірістік үдерісті баяндай келе, зауыттан шығатын қалдықтардың қоршаған ортаға әсерін азайтуға бағытталған шараларды атап өтті. Ерлан Нысанбаев зауытты аралау барысында мысты отпен тазарту және анодты мыс құюдың тәсілдеріне және Н-200 құбырына орнатылған ластаушы бөлшектердің шығындыларын бақылаудың автоматтандырылған жүйесіне куә болды.
Сонымен қатар, министр бастаған топ мысты электролиздеу цехы мен жаңадан бой көтеріп жатқан күкірт қышқылы цехының аумағында болды. Министр өз кезегінде «Қазақмыс» Тобының экологияны өндіріс қалдықтарының зиянды бөліктерінен қорғаудың жүйелерін жақсартудағы бастамасының жалғасын таба беруіне тілектестігін білдірді.
Бағдат ҚАЗКЕНОВ.
