Астанада Металлург күніне арнап Қазақстан Республикасы Өнеркәсіп және құрылыс министрлігінде саланың өркендеуіне үлес қосқандарды салтанатты марапаттау рәсімі өтті.
Құттықтау сөзі барысында министр Қанат Шарлапаев қажырлы еңбегінің арқасында ел экономикасының 5 %-дан астамын құрайтын металлургтер еңбегінің маңыздылығын атап өтті.
Іс-шара барысында Министр Жезқазған, Балқаш, Сәтбаев, Ақсу, Рудный, Ақтөбе, Хромтау, Павлодар, Теміртау, Өскемен, Семей, Риддер және т.б. қалаларының «Қазақмыс Смэлтинг» ЖШС, «ERG Services» ЖШС, «Qarmet» АҚ, «KAZ Minerals» ЖШС және «Казцинк» ЖШС кәсіпорындарының еңбеккерлеріне марапаттар табыстады.
– Бүгінгі таңда 2024 жылдың 6 айының қорытындысы бойынша қара металлургия сіздердің еңбектеріңіздің арқасында өткен жылмен салыстырғанда 14 %-ға дерлік өсіммен 13,7 %-ға жетті. Түсті металлургияда сіздердің еңбектеріңіздің арқасында жарты жылда өткен жылмен салыстырғанда 5 %-дық өсімге қол жеткіздік. Металлургиядағы жалпы көрсеткіш – 8,3 % өсім, жалпы экономикалық өсім 3 %-дан сәл жоғары. Бұл шын мәнінде сіздердің арқаларыңызда жеткен жеңіс, – атап өтті Қанат Шарлапаев.
Металлургия саласындағы қызметтері мен еңбектері үшін 32 маман «Құрмет» орденіне, ІІІ дәрежелі «Еңбек даңқы» орденіне, «Ерен еңбегі үшін» медаліне ие болды. Солардың қатарында «Қазақмыс Смэлтинг» ЖШС құрамындағы Жезқазған мыс қорыту және Балқаш мыс балқыту зауыттарының еңбек озаттары да бар.
Атап айтқанда, Жезқазған мыс қорыту зауыты балқыту цехының ауысым шебері Ибрахимхалил Дүйсенбаев «Құрмет» орденін тақса, аталмыш цехтың кран машинисі Сабыр Мұсабеков пен шаң-газ тазарту жабдықтарын жөндеу және жылу оқшаулау цехының қорғасынмен дәнекерлеушісі Владимир Ткачук «Ерен еңбегі үшін» медаліне ие болды.
Сондай-ақ, Президенттің Жарлығымен марапатқа ие болғандардың қатарында Балқаш мыс балқыту зауыты мысты электролиздеу цехының электролизшісі Ернұр Балтабаев та өндірістегі ұзақ жылғы еңбегі үшін «Ерен еңбегі үшін» медаліне қол жеткізді.
Бағдат ҚАЗКЕНОВ.
