Жезқазған өңіріндегі шахталар мен зауыт, фабрикаларға қажетті жабдықтар дайындауда өзіндік технологиясы қалыптасқан құрылымның бірі – құю-механикалық зауыты. Сапалы өнім шығару жолындағы зауыт еңбеккерлерінің еңбегі ұшан-теңіз.
Металлургтердің кәсіби мерекесінде зауыттағы майталмандар «КәсіпҚорған» кәсіподағы тарапынан марапатқа ие болды. Ұйымның Жезқазған филиалындағы бас техникалық инспекторы Шәкен Кененбаев зауытқа арнайы барып, мереке иелерін құттықтап, өндірістің өрге басуына үлес қосқандарға сый-құрмет көрсетті. Солардың қатарында зауыттағы өндірістік қауіпсіздік және еңбекті қорғау бөлімінің басшысы Ерке Мұқанова мен болат құю цехының аға шебері Қайрат Баймендинов бар. Еңбек озаттарының омырауына Шәкен Жұмабекұлы ІІІ дәрежелі «Еңбек даңқы» төсбелгісін тақты.
Зауыттың бас инженері Ардақ Тоқбергенов те әріптестерін мерекемен құттықтай келіп, кәсіподақ тарапынан көрсетіліп жатқан құрметке алғысын білдірді.
Төл мерекеде төсбелгінің иегері атанған Қайрат Баймендинов еңбегінің еленгеніне дән риза. Ол бұл өндіріс ошағында 1996 жылдан бері еңбек етіп келеді. Осыдан 28 жыл бұрын болат құю цехына қалыпшы болып жұмысқа орналасқан Қайрат Баймендинов мамандығы бойынша сатылай өсіп, бүгінде цехтың аға шебері болып еңбек етуде.
– «Өндіріс», «зауыт» деген ұғымдармен біте қайнасып кеткенімізге де отыз жылға таяпты. Осы жылдар ішінде тәжірибе жинақтап, қазір жастарды баулып жүрген жайым бар. Еңбекте абыройға кенеліп жатырмын. Өмірлік жарымды да осында таптым. 2011 жылы болат құю цехында аспалы кран машинисі Гүлшат Боранбековамен бас құрадық. Екеуміз де бір ұжымда еңбек етудеміз. Салаға қосқан үлесімді бағалап жатқан басшылыққа, «КәсіпҚорған» кәсіподағына алғысым шексіз, – деді марапат иесі.
Бағдат ҚАЗКЕНОВ.
