Өңірімізде халықтың әлеуметтік осал топтарын жұмыспен қамтуға ден қойылған. Ол үшін ерекше қажеттілігі бар жанды
жұмысқа алғысы келген мекеме «Мансап» орталығына өтініш береді. Өз кезегінде мемлекеттік мекеме мүмкіндігі шектеулі
жанды жұмысқа алған кәсіпкер үшін де қолайлы жағдай жасайды.
2024 жылы осындай 123 ерекше қажеттілігі бар жан жұмысқа орналасқан. Көбі арнайы курста оқып, қазір түрлі кәсіпорындарда еңбек етіп жүр. Олардың қалыпты ортада жұмыс істеулері үшін облыс әкімінің арнайы квотасы бар. Жұмысқа жарамды екенін растайтын құжат болса, «Мансап» орталығы қосымша көмек көрсетеді. Әлеуметтік осал топтарға жататын азаматтар мемлекеттік қайтарымсыз гранттарға да қатыса алады.
– Мүмкіндігі шектеулі азаматтардың жұмысқа жарамдысы ғана өтініш бере алады. Электронды түрде еңбек биржасы арқылы өтініш береді. «Бастау» бизнес сертификатын оқып алады. Бизнес жоспарды дайындап,тапсырады. Комиссияға ұсынамыз, – дейді Жезқазған қалалық мансап орталығының басшысы Жарас Ершеев. – Сондай-ақ, жұмыссыз қалған азаматқа соңғы 24 айдағы орташа жалақысының 45 пайызы төленеді. Ол 1 айдан 6 айға дейін беріледі. Демек, сол уақыт аралығында «алма піс, аузыма түс» деп жатпай, азамат жұмыс іздеуі тиіс.
Бұл жерде айта кету керек, мұнада тіркеліп, жұмыссыздығы бойынша төлемақы алулары үшін көптеген адам келіп жатады. Ескеретін жайт, бұл жерде жұмысынан айырылғандар үшін тек қана жәрдемақы ғана тағайындалады,. Ол егер адам белгілі бір жерде тұрақты жұмыс жасаған болса, кем дегенде 6 айға тағайындалады.
Сондай-ақ оқыңыз
Айта кету керек, «Мансап» орталығы арқылы 2024 жылы 1800 азамат тұрақты жұмыспен қамтылған. Ол 300-ге жуық азаматты уақытша жұмысқа орналастыруға жәрдемдескен. Биыл бұл көрсеткішті арттыруды көздеп отыр. Enbek.kz сайтына кіріп онлайн түрде бос жұмыс орындарын қарауға болатынын естеріңізге саламыз. Қазір онда Жезқазған қаласы бойынша 250 бос жұмыс орны, 800 түйіндеме тұр.
Гүлім МАРАТҚЫЗЫ.
