Астана қаласында 28 – 30 мамыр аралығында өткен ХІІІ Халықаралық «Kiosh» еңбекті қорғау конференциясында тау-кен, металлургия және аралас өндіріс еңбеккерлерінің «КәсіпҚорған» кәсіподағы төрағасының орынбасары Абзал Жаңабергенов еңбек жағдайын жақсарту бағытындағы мәселелер бойынша баяндама жасады.
Абзал Жұмағұлұлы өндірістегі өзекті деген мәселелердің қатарында кеншілермен, металлургтер және тау-кен саласы қызметкерлері үшін зейнеткерлік жасын ерте белгілеу жайын алға тартты.
– Бүгінгі таңда Қазақстан посткеңістіктегі кеншілерге жеңілдікпен зейнетке шығу құқығы берілмеген жалғыз ел. Біздің кеншілер ТМД елдеріндегі әріптестерінен 10-30 жыл кеш зейнетке шығады. Тау-кен, металлургиялық өндірісте еңбек жағдайлары өте зиянды және қауіпті күйінде қалып отыр. Осыны ескергенде, 63 жастан зейнеткерлікке шығу бұл сала жұмысшылары үшін ауыр болып отыр. Үкімет тарапынан 55 жастан бастап арнайы төлем қарастырылған (кемінде 7 жылдық еңбек өтілі және міндетті кәсіптік зейнетақы жарнасы жағдайында). Алайда бұл жеткіліксіз. Бұл бағытта түбегейлі заңнамалық шешім қажет, – деп сөзін түйіндеген төраға орынбасары кәсіподақ ұйымы тарапынан мынандай ұсыныстарды айтты.
Атап айтқанда, 55 жастан бастап ерлер үшін 15 жылдық зиянды еңбек өтілімен, әйелдер үшін 12 жылдық зиянды еңбек өтілімен арнайы әлеуметтік төлем тағайындау. ҚР Әлеуметтік кодексінің 7-бабына сәйкес табыстан айырылған жағдайда төлем төлеу тетігін заңнамалық түрде бекіту, еңбекке қатысты заңнамалық өзгерістерді талқылау кезінде кәсіподақтардың міндетті түрде қатысуын қамтамасыз ету.
