1989 жылдың 9 қарашасынан бері Дүниежүзілік Сапа күні өнім өндіруші компаниялардың қызметкерлері арасында да кеңінен аталып келеді. Бұл мерекенің бастамашылары Біріккен Ұлттар Ұйымының қолдауымен ірі халықаралық ұйымдар болды.
Жыл сайын Дүниежүзілік Сапа күнін әлемнің жетпістен астам елі атап өтеді. Сапа – әлемнің әртүрлі елдерінің экономикасындағы ең маңызды мәселелердің бірі. Қазіргі уақытта бұл кез-келген кәсіпорынның, саланың және тұтастай алғанда елдің табысты жұмысының кепілі болып табылатын өнімнің сапасымен тікелей байланысты. Адамдардың лайықты өмір сүру деңгейін және елдің тұрақты дамуын қамтамасыз ету үшін қажетті қоғамды басқару сапасына да назар аударылады. Бұл күнді «Қазақмыс» корпорациясы жыл сайын атап өтіп, сапа қызметінің дамуына үлес қосқан майталмандарды ұлықтайды. Осыған орай «Қазақмыс» корпорациясы» ЖШС «Жезқазғантүстімет» ӨБ-нде салтанатты жиында сала мамандарына құрмет көрсетілді. Корпорация өндіретін өнімнің сапасын бақылап, әлемдік нарықта өзіндік орнын алуға еңбек сіңіргендерге «Қазақмыс» корпорациясының, сапа қызметі департаментінің, «КәсіпҚорған» кәсіподағының, «Amanat» партиясы «Қазақмыс» корпорациясы» ЖШС жанындағы Ұлытау облыстық филиалы басшылығының атынан сый-сияпат жасалынды.
Бұл бас қосуда «КәсіпҚорған» кәсіподағы Жезқазған филиалының бас техникалық инспекторы Шәкен Кененбаев сапа қызметін мінсіз атқарып жүрген жандарға алғысын білдіре келіп, кәсіподақ төрағасының жарлығына сай, 40 жыл еңбек өтілі бар түсті металлургия өнімдерінің бақылаушысы, жоғары білікті маман, жастардың тәлімгері Қарлығаш Дүйсенбаеваны «Еңбек озаты» төсбелгісімен марапаттады.
Сонымен қатар, Жезқазған байыту фабрикасындағы рентгенспекторлық талдау зертханасының басшысы Нұргүл Күреңбаева мен Жезқазған аймағы бойынша техникалық және аналитикалық талдау басқармасы басшысының орынбасары Әсел Шыңғысова «Кәсіподақтың Құрметті қайраткері» атанды. Бір топ майталман кәсіподақтың Құрмет грамотасына ие болды.
Сондай-ақ оқыңыз
Бағдат ҚАЗКЕНОВ.
