«Қазақмыс» корпорациясы» ЖШС «Жезқазғантүстімет» ӨБ қарасты кен өндіру, байыту кешендерінде қауіпсіздік саясатын нығайтуға үлес қосып жүрген кеншілер мен байытушыларды және цехтар мен телімдерді марапаттау рәсімі өтті. Оған өндірістік бірлестік пен «КәсіпҚорған» кәсіподағы, «Jastar Bolashaq» Жастар одағы ұйытқы болды.
Кеншілер қаласындағы орталық алаңда өткен ұлықтау салтанатына «Қазақмыс» корпорациясы» ЖШС «Жезқазғантүстімет» ӨБ бас директоры Жасұлан Байниязов, «КәсіпҚорған» кәсіподағы төрағасының орынбасары Абзал Жаңабергенов қатысып, 2024 жылдың бірінші тоқсанында еңбекті қорғауда үздік шыққандарға құрмет көрсетті.
«Проходкалау телімінің үздік бригадасы» аталымын Оңтүстік Жезқазған кеніші № 45 шахтаның № 26 телімінен Фархат Даудабаевтың бригадасы алса, «Кен өндіру телімінің үздік бригадасы» номинациясын «Жомарт» кенішінің № 1 кен өндіру телімінен Ғалымжан Тапаевтың бригадасы еншіледі. Дизельдік телімнің үздік бригадасы деп «Анненск» шахтасының № 88 телімінен Қанат Ибраимовтың ұжымы танылды.
«Шахтаның көмекші үздік бригадасы» аталымы «Жыланды» кеніші Шығыс Сары-оба шахтасынан № 9 жару телімінің Сұңғат Ембергенов жетекшілік ететін бригадасына бұйырды. «Шахтаның үздік басшысы» атағына «Анненск» шахтасының басшысы Аслан Әбжаппаров ие болды. «Көмекші цехтың үздік басшысы» ретінде Жезқазған байыту фабрикасының № 2 бас корпусының басшысы Марғұлан Әбдікеров, «Көмекші үздік телім басшысы» деп «Жыланды» кенішінен телім басшысы Батырхан Әбжанов танылды.
«Көмекші үздік бригада» атағын мамандандырылған құрылыс-механикалық басқармасының №2 Ардақ Көпеевтің жетекшілігіндегі бригадасы иеленді. «Көмекші телімнің үздік басшысы» атағын құю-механикалық зауытының ұста-дәнекерлеу цехынан Аян Баймырзаев алды. «Батыс» кеніші № 67 шахтаның № 10 телімінен жарушы Медет Бақытов «Үздік параматикші» номинациясына ие болды. Өндірістік қауіпсіздік және еңбекті қорғауға қосқан үлесі үшін «Батыс» кенішінің өндірістік қауіпсіздік және еңбекті қорғау бөлімінің жетекші инженері Алмат Қожантаев марапатталды.
Бағдат ҚАЗКЕНОВ.
