«Қазақмыс» корпорациясының өндірістік аймақтардағы нысандарының қауіпсіздігіне қалқан болып жүрген «Қорғау қызметі» ЖШС-нің Жезқазған филиалында жыл сайын сала бойынша үздіктерді марапаттау өтеді. Бұл дәстүрлі шараға «КәсіпҚорған» кәсіподағы комитетінің төрағасы Жанна Ерғалиева ұйытқы болып отыр.
Күзет саласындағы іскерлік, қырағылық, қауіпті жағдай туындаған мезетте оң шешімдер шығару қабілетіне ие күзетшілердің еңбектеріне құрмет ретінде ұйымдастырылатын марапаттау рәсімінде бірқатар үздіктерге арнайы номинациялар тапсырылды.
2024 жылдың қорытындысына сәйкес, Мүсілім Ибраев, Венера Бекешева, Серік Әбікенов «Үздік команда бастығы» атағына ие болды. Татьяна Феттер, Мұрат Байжұманов, Константин Шегай «Үздік топ басшысы» атанды.
– Біздің қауіпсіздікті күшейтудегі еңбегіміз күнделікті өмірде қарапайым адамдардың көзіне түсе бермеуі мүмкін. Алайда, сақтық шараларын орындап, нысандардың қорғалуында біздің қырағы күзетшілеріміздің қауіп-қатермен бетпе-бет келетінін ұмытпаған абзал. Осы еңбегімізді бағалап, құрметтеп жатқан «Қорғау қызметі» ЖШС Жезқазған филиалы басшылығы мен осы шараның ұйымдастырушысы «КәсіпҚорған» кәсіподағы комитетінің төрағасы Жанна Ерғалиеваға алғысымды білдіремін, – деді 2024 жылдың үздігі атанғандардың бірі Мұрат Байжұманов.
Бағдат ҚАЗКЕНОВ.
