«Қазақмыс» корпорациясы» ЖШС «Қарағандытүстімет» ӨБ қарасты «Нұрқазған» кеніші – 2050 жылға дейін кен қоры бар, болашағы жарқын ірі кен орнының бірі. 2006 жылы алғаш үңгілеу жұмыстары жүргізілген кеніш содан бері корпорация деңгейінде жылдық жоспарды игеру мен еңбек қауіпсіздігі саясатын жүзеге асыруда алдыңғы қатарда келеді.
Негізгі кен өндіретін телімдерден бөлек, мұнда бірнеше қосалқы телімдер бар. Қосалқы болғанымен, атқарар жұмыстарының салмағы басым. Дизель телімі жеті қат жер астындағы қазба байлығын конвейер желісі арқылы жер бетіне шығарумен айналысады. Ол үшін мұнда тиеу, жеткізу техникалары мен бір өрт сөндіру, жұмысшылар мен инженер-техникалық қызметкерлерді тасымалдайтын көліктердің уақытылы іске жарамды болуына жауапты.
Нұрлан Мамай басшылық жасайтын ұжым былтырғы жылдың өндірістік жоспарын тиісті деңгейде орындады әрі қауіпсіздік саясатында нәтижелі көрсеткіш көрсетті.
– Телімде 80-ге жуық адам еңбек етеді. Тау-кен жыныстарын тиеп, жеткізу – біздің басты міндетіміз. Тәуліктік нормамыз – 12100 тоннадан 12500 тоннаға дейін. Осы жоспарды орындауда ұжымның жігіттері тәжірибелерін ортақ іске жұмылдыра білуде. Бригадиріміз Қанат Мырзабаев бастаған звеношылар Ерболат Ғұсманов, Бақытбек Махабал, Қайсар Сәрсембаев сынды кәсіби мамандар – жастарға үлгі.
Дизель телімінің басшысы Нұрлан Мамай
Өндірістегі қауіпсіздік саясаты – адам өмірін сақтаудың басты кепілі. Сондықтан жұмыс барысында қауіпсіздікті қатаң ескереміз. Қорытындылай айтқанда, біздің дизель телімі «Нұрқазған» кенішінің жылдық көрсеткішке жетуіне өз үлесін қосып келеді, – дейді Нұрлан Аманбекұлы.
Нұрлан Мамай бұл ұжымға үш жылдан бері басшылық жасауда. Алғашында тау-кен жұмысшысы болып орналасқан жас маман жұмысқа деген ынтасының арқасында еңбек жолында сатылай өсіп, бүгінде телім тізгін ұстап отырған жайы бар.
Кен өндірісінің білікті мамандары топтасқан ұйымның ауызбіршілігі мығым. Соның арқасында дизель телімі үнемі көшбасынан табылып келеді.
Бағдат ҚАЗКЕНОВ.
Суреттерде: Телімдегі звеношы Ерболат Ғұсмановтың бригадасы шыңырауда.
Дизель телімінің басшысы Нұрлан Мамай.
