«Нұрқазған» байыту фабрикасының әкімшілік-тұрмыстық кешенінде үнемі қызу жұмыс жүріп жатады. Мезгілдің қай кезеңі болсын мұндағы жұмысшылар өндіріс ошағының айналасын таза қалыпта ұстауға баса мән береді.
Әрбір кәсіпорынның тұрмыстық шаруашылығын реттейтін құрылымның бірі де бірегейі осы құрылым. Светлана Әбиеваның жетекшілігіндегі әкімшілік- тұрмыстық кешен шаруашылығында 24 адам еңбек етуде. Бақша күтушісі, кіші техникалық қызметкер сынды кәсіп иелері фабрика ғимаратының мұнтаздай таза, айналасының көркемдігіне үлестерін қосып келеді.
– Көктем шыға фабриканың айналасын абаттандыру жүзеге асырылады. Арнайы белгіленген аумаққа гүлдер отырғызылып, талдар егіледі. Мұның барлығын қарамағымдағы қыз-жігіттер ың-шыңсыз атқарады. Көктемнен қара күзге дейін соларды күтіп, баптау тұрмыстық кешен жұмысшыларының міндеті, – дейді Светлана Тұрсынқызы.
Сондай-ақ оқыңыз
Мұндай абаттандыру мен көгалдандыру жұмыстары «Нұрқазған» кенішінің аумағында да жыл сайын жүзеге асады. Қарлығаш Сатыбалдықызы бастаған тұрмыстық кешен жұмысшылары абаттандыру, тазалық жұмысына жауапты. Біз қос өндіріс алаңына барғанымызда гүл отырғызу, тал егу сынды жұмыстар қызу жүріп жатқанына куә болдық.
Көгалдандыру жұмыстарымен шұғылданып жүрген Дина Асылбаева емен-жарқын жүзді жан екен. Бір өзі гүл отырғызып, кеніштің аумағын абаттандырып жүрген Дина Сәкенқызы «Нұрқазғанда» екі жылдан бері еңбек етіп келеді. Қарапайым еңбек адамының арқасында кеніштің айналасы гүлденіп-ақ тұр.
– Биыл аумаққа 2 мыңнан аса тұп гүл отырғызылды. Оның арасында раушан гүлдері де бар. Кейде гүл отырғызу біздің климатта қолайсыз болғанымен оны баптап-күтудің арқасында күзге дейін жайқалып тұрады. Менің мамандығым бақша күтуші болмаса да өзіме жүктелген жұмысты жауапкершілікпен атқарамын. Болашақта осы аумақтан бақ қалыптастырсам деген ойым бар. Менің бұл идеямды жүзеге асыруға әкімшілік-тұрмыстық кешен басшысы Қарлығаш Сатыбалдықызы қолдайды деп сенемін. Жалпы мен гүл егіп, бау-бақшада еңбек еткенді ұнатамын. Бұлар да жаратылыс иесі болғандықтан оларға ерекше күтім керек, – дейді Дина Сәкенқызы.
Көгалдандырушы бола жүріп, еңбегімен ұжымның көңіліне шыққан Дина Сәкенқызының отырғызған гүлдері жайқалып, жаз бойы кеніштің көркіне-көрік қоспақ. Бұл еңбек адамын шабыттандыратын іс деп біліп, бағалай білу керек.
Бағдат ҚАЗКЕНОВ.
