Жақында «Қазақмыс Холдинг» еңбеккерлерінің «JastarBolashaq» Жастар одағы екінші облыстық киберспорт FIFA-22 «Чемпиондар Лигасы Jastar Bolashaq 2022» атты чемпионат ұйымдастырды.
Турнирге «Қазақмыс Холдинг» ЖШС үш өндірістік аймағынан 300-ге жуық еңбеккер қатысты. Қарағанды, Балқаш, Жезқазған аймақтарында еңбек ететін «JastarBolashaq» Жастар одағының мүшелерінің тартысты додасы бір аптаға созылды. Алғашында кәсіпорындар арасында іріктеу ойындары жүргізілді. Өз әріптестері арасында іріктеу ойындарында жеңіп шыққан 32 чемпион, «Чемпиондар лигасы» турнирінің топтық кезеңіне жолдама алды. Биылғы жылы жастарға жаңадан берілген Жезқазған қалалық «Жастар сарайының» ғимаратында турнирдің ақтық ойындары тартысты өтіп, жүлделі орындар өз иелерін тапты.
Чемпионат қорытындысы бойынша «Жыланды» кенішінен үздік ойын көрсеткендері үшін Еркебұлан Орынбаев пен Оңтүстік Жезқазған кенішінен Сәбит Әбдіқалықов арнайы марапатталды. Үшінші орынды «ЭРСУ» кәсіпорнынан Ерсін Лабаков алса, екінші орынды Ғ. Омаров атындағы шахтапроходкалау тресінен Қуаныш Байназаров еншіледі. Бірінші орынның тұғырынан «Транко Экспресс» ЖШС-не қарасты «ПАТП» кәсіпорнынан Айдын Бектұрсын көрінді.
Бағдат АЙТӨРЕҰЛЫ.
