Ата-баба аңсаған азат күннің орнап, Тәуелсіз қазақ елінің көк Туы әлем назарын аударып, көкте желбірегеніне биыл – 30 жыл. Тәңірдің баға жетпес сыйына баланатын Тәуелсіздіктің арқасында еліміз қай салада болсын табысқа жетіп келеді.
Мыс алыбы саналатын «Қазақмыс» корпорациясының ел экономикасын әлдендірудегі қарышты қадамдары аймағымызда да көрініс табуда. Әлеуметтік қолдаудан бөлек, өндіріс жастарының мәдени орта қалыптас-
тырып, жұмыстан тыс уақыттарын пайдалы істерге бағыттауына да корпорация демеушілік танытуда. Соның бір жарқын дәлелі ретінде «Қазақмыс» корпорациясы құрылымдарында еңбек ететін жастардың көңілді тапқырлар клубын айтуға болады. Әзіл-қалжыңды серік еткен жастардың басын бір арнаға тоғыстырған клубтың ойынына «Қазақмыс» корпорациясы еңбеккерлерінің «Jastar Bolashaq» Жастар одағы серпін беріп келеді.
Ел Тәуелсізідгінің 30 жылдығы қарсаңында аталмыш жастар ұйымы Сәтбаев қаласындағы Ш.Ділдебаев атындағы Кеншілер сарайында «Тәуелсіздік жастары» атауымен көңілді тапқырлар клубының фестивалін ұйымдастырды. Қарағанды, Балқаш, Жезқазған, Сәтбаев өндірістік алаңдары мен Қарсақбай мыс қорыту зауытынан 18 команда бақ сынаған ойында үздіктер анықталды.
Қағытпа қалжың, әжуа әзілмен екі күн бойына көрермендерге күлкі сыйлаған құрама командалардың ойыны тартысты да қызықты өтті. Күлкі «ауылының» майталмандары саналатын азаматтар өз командаларының әзіл-қалжыңының мән-мағынасына ерекше көңіл бөлді. «Қазақмыс» корпорациясы, «Nur Оtan» партиясы «Қазақмыс» корпорациясы» ЖШС жанындағы Қарағанды филиалы, Тау-кен металлургия және аралас өндіріс еңбеккерлерінің «КәсіпҚорған» кәсіподағы демеушілік жасаған ойында үздік деп танылғандарға кубок пен ақшалай сыйлық табысталды.
Екі күн күлкі әлемінің құдіретін сездірген ойыншылар қатарынан Бас жүлдені Шығыс Жезқазған кенішінің құрама командасы жеңіп алды. Жеңімпазға «Қазақмыс» корпорациясы тағайындаған 400 мың теңге ақшалай сыйақы мен кубок табысталды. «Nur Оtan» партиясы «Қазақмыс» корпорациясы» ЖШС жанындағы Қарағанды филиалы тағайындаған бірінші орынның жүлдесі – 300 мың теңгені «Қазақмыс Мэйнтенанс Сервисиз» ЖШС иеленсе, «КәсіпҚорған» кәсіподағының екінші орынға тіккен 200 мың теңгесін «Жезқазған медициналық орталығы» ЖШС командасы алды. Кәсіподақтың үшінші орын жүлдесіне Сәтбаев қаласындағы жылу энергетикасы кәсіпорнының құрама командасы лайық деп танылды. Жүлдені «КәсіпҚорған» кәсіподағының төрағасы Ерболат Сатыбалдин табыстап, жастардың шығармашылық ізденістеріне алғысын білдірді.
Балқаш командасына Сәтбаев қаласы әкімінің кубогы бұйырса, «Транко Жез» ЖШС Жезқазған қаласы әкімінің сыйлығын иеленді. Қос командаға 100 мың теңгеден тапсырылды. Қарсақбай мыс қорыту зауытының командасы «Жыл жаңалығы» номинациясында топ жарып, 100 мың теңгені еншіледі.
Ал, Жезқазған жылу-электр орталығы, құю-механикалық зауыты, энергожөндеу мамандандырылған басқармасы «ЖасStar» номинациясын еншіледі. Жезқазған мыс қорыту зауыты «Жаңа толқын», Ғ. Омаров атындағы шахтапроходкалау тресі «Креатив», «Жыланды» кеніші «Көңілді», «Жомарт» кеніші «Сахна сәні», Жезқазған байыту фабрикасы «Ерекше стиль» номинацияларымен марапатталды. Сонымен қатар, «Қорғау қызметі» ЖШС «Фестиваль көркі», «Батыс» кеніші «Драйв», Энерегтика басқармасы «Жұлдызды жастар», Қарағандыдан келген машина жасау зауыты командасы «Әуезділік» номинацияларына лайық деп танылды. Бұл командаларға 50 мың теңге көлемінде сыйақы берілді.
Ерекше өнерімен көзге түскен жекелеген ойыншылар да жүлдесіз қалмады. Энергетика басқармасының жұмысшысы Айбатыр Орынбасар «Үздік капитан», «Жыланды» кенішінен Нысанәлі Бекмұрза «Үздік фронтмен», «Жомарт» кенішінен Сержан Байдаралинов «Фестивальдің үздік ойыншысы» атанды.
«Jastar Bolashaq» Жастар одағының жастар саясатын жүзеге асырудағы бұл жоба алдағы уақытта да жалғасын таппақ.
Бағдат АЙТӨРЕ.
