Сондай-ақ оқыңыз
«Сарыарқа» магистральдық газ құбырының салынуына байланысты Жезқазған өңірі екі-үш жылдан бері көгілдір отынның игілігін көре бастады. Өңірді газдандыру жобасы жалпы 3 кезеңнен және 7 іске қосу кешенінен тұрады. Қазір ІІІ кезең бойынша жоспарланған істер аясында Кеңгір ауылына газ құбыры мен желілерін тарту жұмыстары басталды.
Бұл жоба бойынша тендерді ұтып алған мердігер «Шымкентгаз» ЖШС ұзындығы 25,1 шақырым құбыр желілерін тарту жөніндегі құрылыс-монтаж жұмыстарын 1 мамыр мерекесі қарсаңында бастап, биылғы жылдың 1 қыркүйегінде аяқтауды жоспарлауда. Құбыр тарту жұмыстары аяқталысымен пайдалану жөніндегі акт рәсімделіп, үйлерге газ кіргізіле бастайтын болады. Осы жайдан хабардар болған Кеңгір ауылының тұрғындары биылғы қыста көгілдір отынның игілігін көреміз деп қуанып отыр.
Негізінде, Жезқазған қаласы аумағын газдандыру мерзімі 2019 – 2026 жылдар аралығын қамтиды. Бұған дейін Талап ауылы, Бөгенбай батыр ықшам ауданы, Геологиялық кенті, Бекболатсай және Қостанкелді ықшам аудандары, 91-94-орамдар мен Батыс ауданы бойынша газға қосу жұмыстары аяқталып, 1576 отбасы көгілдір отынның игілігін көріп отырған еді. Бұл аумақтағы үйлерде әлі де 195 абоненттің газға қосылу мүмкіндіктері бар. Сондай-ақ, 91-94-орамдардағы өткен жылғы жобадан қалып қойған 11 көшедегі 353 үйді газбен жабдықтау үшін жобалық-сметалық құжаттамасы әзірленуде. Жалпы, ІІІ кезең бойынша Жезқазған қаласын көгілдір отынмен қамтудың жоспарланған жобалары 66-84 және 4-6-орамдарға газ тарту жұмыстарын жүргізу арқылы аяқталады.
Амандық РАХҰЛЫ.
