Әр дәуірдің өз алып тұлғасы бар. Тарихта тағылымды ісімен танылған сол алыптардың ізі Жезқазған өңірінде де сайрап жатыр. Қазақ халқының маңдайына біткен дара дарын, ұлтымыздан шыққан тұңғыш геология саласының академигі Қаныш Имантайұлы Сәтбаев жиырмасыншы ғасырдың жиырмасыншы жылдары кенді өлкеге келіп, мәңгі өлместей із бен іс қалдырды.
Қарамыстың алыбы Қарсақбай мен Үлкен Жезқазғанның жұлдызын жақты. Тау, тасты кезіп жүріп, өңірдің өндірісін өркендетті. Қиындыққа қасқая қарсы тұрған Қаныш Имантайұлы Баянауылдың тумасы болсада Жезқазғанға ерекше ілтипатпен қарады. Міне, биыл сол ғұламаның туғанына 124 жылтолып отыр.
Тұңғыш Ғылым академиясының іргетасын қалап, талай ғалымның жолын ашқан академиктің туған күнінде жезқазғандықтар құрмет көрсетуді дәстүрге айналдырған. 12 сәуір күні қала басшылығы мен зиялы қауым өкілдері, аймақ ақсақалдары мен жастар Серке Қожамқұлов атындағы театр алдынажиылып, академиктің ескерткішіне гүл-шоқтарын қойды. Жиналған көпшілікпен бірге «КәсіпҚорған» кәсіподағының төрағасы Уәлихан Нұржанов та ғалымға құрмет көрсетті.
Жезқазған қаласы әкімінің орынбасары Бақытжан Жайлаубаев Қаныш Имантайұлының қазақ ғылымына, өңірдің дамуына қосқан үлесін тілге тиек етті. Академикке деген құрметтің көрінісі Сәтбаев қаласында да жалғасын тапты.
Бағдат ҚАЗКЕНОВ.
