«Нұрқазған» байыту фабрикасындағы Нұрзада Мұрсалов басшылық жасайтын ұсақтау цехының құрамы жаңа ұсақтау телімінің іске қосылуымен ұлғая түсуде. «Алтын алмаз инженеринг» компаниясы құрылысын аяқтап берген телімде өндірістік үдерісті жүзеге асырудың тетіктері кезең-кезеңімен қолданысқа енгізілуде.
Бүгінгі таңда жылына 3 млн. 800 мың тонна кен ұсақтауға қабілетті цех көлемінің ұлғаюы фабриканың өндірістегі қуатының арта түсуіне сеп болмақ. Ұсақтау мен сұрыптаудың жаңа технологиясын қолданысқа енгізу өз кезегінде келер жылдардағы өндіріс нысанының сапалы өнім көрсеткішіне жетуде маңызды рөл атқармақ.
– Жаңа ұсақтау телімінің кен байытудағы үлесі қомақты бола түспек. Біздің цехтың құрамына қосылған бұл үш ұсақтау корпусының жұмысының нәтижесінде тек сапалы өнім өндіру жоспарын жүзеге асырудан бөлек, жаңа жұмыс орындарын ашу көзделді. Телімге қажетті 11 адамды тұрақты жұмысқа қабылдаудамыз. Қазіргі күні 3 адам жұмысқа қабылданып, талапқа сай тексерістен өтуде. Мұнда қажетті негізгі мамандықтар – конвейер машинисі, слесарь-жөндеуші, дәнекерлеуші. Бұл цехта 175 адам еңбек етуде. Олардың қатарын толықтыру есебінен жаңа телімнің жұмысын ілгерілетуді көздеп отырмыз.
Цехтың жұмысы 5 ауысымға жүктелген. Әрбір ауысымның нәтижеге қол жеткізуі маңызды. Осы ретте цехтың жұмысының жүзеге асуына сүбелі үлестері бар еңбеккерлерді атап өтуді жөн санадым. 2007 жылы фабрика іске қосылғаннан бері еңбек етіп келе жатқан ұсақтаушылар Жақсымұрат Қуанышбаев, Бақытбек Сейтхан, конвейер машинисі Жарас Саданның еңбегі сүбелі, – деді цех басшысы Нұрзада Мұрсалов.
Сондай-ақ оқыңыз
Ұсақтау цехының басшысы Нұрзада Мұрсалов
Еңбек озаттары Ғалымжан Қасымбеков, Аман Омар, Григорий Зегаинов, Татьяна Афонина, Гүлжазира Сәрсенбаева, Айгүл Құрманғажиева, Сәуле Өтебаева, Валинтина Митина, Ермек Мұратхан, Думан Омаров, Тұрсын Есен, Әбдірахман Қаржауов, Қуанар Қайратбек, Арман Қойшыбай, Марғұлан Алданхан, Льонти Төкенеев, Тайлан Жүндібаев, Бегалы Қожамұратов, Нұрпейіс Қолданов, Ғабит Масалимов, Төлеубай Бердалин, Қазыбек Қожагелдиев, Сәкен Жалмұрзаев ұжымның мақтаныштарына айналған. Еңбек әулетінің өкілдері Бақытжан Ерембетов пен Жандос Төлеген дәстүр сабақтастығын лайықты жалғастырып келеді.
Цехтағы техникалық-инженерлік құрамда өздерінің білікті маман екендіктерін дәлелдеп жүрген майталмандар қатары қалыптасып та үлгерген. Атап айтқанда, Ербол Күзембаев, Бейбіт Әбдреймов, Айдар Айтбаев, Жұмабек Омаров, Нұрсұлтан Дошабеков, Әділет Төлеубайдың іскерлігі жұмысты алға жылжытуда.
Кейінгі жас буын мамандардан Сұлтан Жандос, Асылан Ермағанбетов, Рахымжан Мыңбаев, Ермек Дагилов, Айдос Дамыстың табысқа қол жеткізудегі көрсеткіштері нәтижелі.
«Нұрқазған» байыту фабрикасы бүгінде жас байытушылардың шеберханасына айналды. Қарағанды техникалық университетін тәмамдап келген жастар қатарға қосылуда. Олардың да өндіріске деген беталысы көңіл қуантады. Еңбекке араласып жүрген Дәурен Қолдасов, Алмаз Жұмажанов, Жамбыл Сатыбалдиев, Бауыржан Тоқтамыстың өз кәсібіне деген жауапкершіліктері айрықша.
«Нұрқазған» байыту фабрикасының тірегіне айналған цехқа басшылық жасап отырған Нұрзада Мұрсаловтың байыту саласындағы тәжірибесі көпшілікке жақсы таныс. Нұрзада Мұхамедияұлы Қарағанды металлургия институтын бітіргеннен кейін, жолдамамен Жезқазған мыс зауытына жіберілген. Нұрзада Мұрсалов зауыттың бас инженері, кейіннен балқыту цехының бастығы болып жұмыс істеді. Он жыл металлургия саласында шыңдалған Нұрзада Мұрсалов 2007 жылы Қарағандыға көшіп, пайдалануға беруге дайындалып жатқан «Нұрқазған» байыту фабрикасына жұмысқа орналасты. Шеберден ұсақтау корпусының бас инженері, кейін бастығы болып тағайындалды. Іргелі ұжымның береке-бірлігін ұйыстыра білген басшының іскерлігінің нәтижесінде цех өнім өндіру көрсеткішінен төмендеп көрген емес. Ал, жаңадан қатарға қосылған телім бұл нәтижені еселей түсетініне ұжымның сенімі мол.
Бағдат ҚАЗКЕНОВ.
