Жаңа жыл қарсаңында «Қазақмыс» корпорациясы еңбеккерлерінің балаларына сыйлық таратып, мерекелік көңіл-күй тарту ету «КәсіпҚорған» кәсіподағында игі дәстүрге айналды. Әсіресе, кәсіподақтың Жезқазған филиалы мыңдаған балақайларды мереке қарсаңында қуанышқа бөлеп, шаттыққа кенелтеді.
Биыл да бұл дәстүр жалғасын тапты. Сонымен қатар, филиалдың ұйытқы болуымен «Жаңа жыл қызықтары» байқауы өтуде. Оны ұйымдастырудағы негізгі мақсат – балақайлардың шығармашылық қабілетін шыңдап, өнерлерін паш ету. «КәсіпҚорған» кәсіподағы Жезқазған филиалының аппарат жетекшісі Жанар Салықованың айтуынша, бұл байқау биыл екінші мәрте ұйымдастырылып отыр.
– Әлемді дүр сілкіндірген пандемияның салдарынан жаңажылдық ертеңгіліктерге тосқауыл қойылғаны баршаға мәлім. Сондықтан біз кішкентай балақайлардың мереке қарсаңындағы көңіл-күйлерін көтеріп, қуанту мақсатында осы байқауды қолға алған болатынбыз. Әрбір қатысқан баланың өнеріне ерекше ықыласпен қарап, кәсіподақтың инстаграм парақшасына жариялаудамыз. Үздіктерін Жаңа жыл қарсаңында анықтап, марапаттайтын боламыз, – дейді Жанар Сәркенқызы.
Кішкентай балақайлар асыға күтетін Жаңа жыл мерекесінде кәсіподақ ұйымы балақайларды осылайша бір қуантып тастады.
Бағдат ҚАЗКЕНОВ
