Балқаш қаласында «ZhasSkills Kazakhmys 2023» кәсіби шеберлік чемпионаты өтті. Жарысты «The Ulytau Educational Foundation» қоғамдық қайырымдылық қоры және «Қазақмыс» корпорациясының политехникалық колледжі ұйымдастырды.
«ZhasSkills Kazakhmys 2023» – бұл оқушылар арасындағы чемпионат, ол өскелең ұрпаққа кәсіби бағдар алуға, өзекті мамандықтар мен жұмысшы мамандықтарды игеруге мүмкіндік береді.
Политехникалық колледжде, кәсіби шеберлік байқауы екінші рет өткізіліп отыр. Аталмыш байқау төрт құзіреттілік бойынша өтті. Олар – «Дәнекерлеу ісі», «Электромонтаждау», «Слесарлық және жөндеу жұмыстары» және «Металлургия».
Чемпионаттың бірінші іріктеу кезеңі Балқаш қаласы мен Шашубай кенті мектептерінің базасында өтті. Оған 17 мектептен 139 жоғары сынып оқушысы қатысып өзара бақ сынасты. Чемпионат финалына техникалық мамандықтарға бейімділігі жоғары және «Қазақмыс» корпорациясының политехникалық колледжінде оқығысы келетін 32 оқушы шықты.
Чемпионат қорытындысы бойынша барлық қатысушыларға көтермелеу сыйлықтары мен сертификаттар табысталды. Байқау жеңімпаздары дипломдармен және ақшалай сыйлықтармен марапатталды.
«Қазақмыс» корпорациясы» ЖШС баспасөз қызметі.
