Шыңыраудан кен қазып, елдің ырысын еселеп жүрген кеншілердің де кәсіби мерекесі жақындап келеді.
Өңір мақтаныштарына айналған кеншілердің төл мерекесі қарсаңында «Батыс» кенішіндегі «КәсіпҚорған» кәсіподағы комитеті № 67, № 73 шахталарының еңбеккерлері арасында шағын футболдан жарыс ұйымдастырды. Алаңға 8 команда шығып, өзара бақ сынасты. Ала доп бәсекесіне қатысушыларды «Amanat» партиясы «Қазақмыс» корпорациясы» ЖШС жанындағы Ұлытау облыстық филиалының атқарушы хатшысы Асқар Нұржанов құттықтап, қолдау білдірді.
Жеңімпаз командаларға кәсіподақ комитетінің төрағасы Абзал Байсалбаев пен Асқар Нұржанов марапаттар тапсырды. Батыстықтар арасындағы бәсекеде № 67 шахтаның дизель учаскесі І орынды жеңіп алса, аталмыш шахтаның үңгілеу учаскесі ІІ орынды еншіледі. № 73 шахтаның құрама командасына ІІІ орынның жүлдесі бұйырды.
Бағдат ҚАЗКЕНОВ.
