Сауда орындарында жаңа жылдан кейін картоп бағасының екі есеге дейін күрт көтеріліп кетуі адамдардың арасында алаңдаушылық туғызған еді. Осыған орай облыс әкімдігінің қадағалауымен сауда және тұтынушылардың құқығын қорғау департаменті және «Ұлытау» әлеуметтік-кәсіпкерлік корпорациясы мониторинг жүргізіп, тиісті шараларды қолға алуының арқасында әлеуметтік маңызы бар азық-түлік тауарларына жататын картоптың бағасы ойдағыдай реттелді.
«Ұлытау» ӘКК өкілдері Павлодар қаласына барып «Ақтоғай АГРО» ЖШС-мен келісімге келіп, тұрақтандыру қорына 38 тонна картоп сатып алды. Келісі 198 теңгеден бағаланған бұл өнім өткен аптада Жезқазғанға жеткізілген бетте тиісті сауда орындарына таратылып берілді.
Атап айтқанда, Жезқазған қаласындағы «Органик» бірлескен кәсіпкерлік дүкеніне, «Самаз» супермаркетіне, «Нарық» базарына, «Шаруа» сауда үйіне, «Ауыл өнімдері» павильондарына, Кеңгірдегі «Жанұя» гипермаркетіне, Сәтбаев қаласындағы «Жанай», «Нұртай» супермаркеттеріне, «Камалов», «Аймурзаева» ЖК-не, «Ерасыл» дүкеніне, Жаңаарқа кентіндегі «Жандос» супермаркетіне, «Әлеуметтік» дүкенге өткізілген картоптың шекті бағасы 218 теңге деп бекітілді. Осы орайда облыстық сауда және тұтынушылардың құқығын қорғау департаменті мен Жезқазған қаласы кәсіпкерлік және ауыл шаруашылығы бөлімінің қызметкерлері сауда нысандарын арнайы аралап, бекітілген бағаның сақталуын қадағалап, жалпы әлеуметтік маңызға ие азық-түлік бұрыштарының жұмыстарына бақылау жасады. Сондай-ақ, мониторинг кезінде жауапты тұлғалар сауда орындары иелерімен бағаны негізсіз көтермеу жөнінде түсіндіру жұмыстарын жүргізді. Қазірде жағдай біршама тұрақталды.
Облыс әкімдігі әлеуметтік маңызы бар азық-түлік бағаларын тұрақтандыру қоры арқылы қалыпты деңгейде ұстауға ықпал жасап, ұдайы бақылауда ұстап отыр. Тұрақтандыру қорын халықтың күнделікті тұтынатын әлеуметтік маңызға ие тауарларымен ай сайын толықтырып отырудың жолдары қарастырылуда.
Амандық РАХҰЛЫ.
