Өңірдегі кадр тапшылығы және оны шешудің тиімді жолдары «Атамекен» Ұлттық кәсіпкерлер палатасының Ұлытау облыстық филиалында өткен жиында кеңінен талқыланды.
Мемлекет басшысының 2025 жылды жұмысшы мамандықтар жылы деп жариялауы саладағы сан түрлі мәселеге оң серпінін бермек. «Атамекен» ұсынған алаңда еңбек нарығында сұранысқа ие кадрларды даярлайтын кәсіптік білім беру мекемелері мен оларға жұмыс беруші компания өкілдері бір үстелдің басына жиналды. Өңірде кадр тапшылығы проблемасы әлі де өткір екендігін аймақ басшысының орынбасары да тілге тиек етті.
– 2022 жылы Ұлытау облысы құрылғаннан бері кадр мәселесі өзекті күйінде қалып отыр. Мемлекеттік қызметшілер де жетіспей жатыр, жұмысшы мамандықтарына да сұраныс жоғары. Осы бір мәселенің түйінін тарқату керек, – деді Зина Ақылбекова өз сөзінде.
Мәселен, біздің облыста 15 техникалық және кәсіптік білім ордасы бар екен. Аталған колледждерде 7000-ға жуық студент білім алуда. Өткен 2023 жылы оқуын аяқтаған 1703 түлектің 1141-і, яғни 83 пайызы алған дипломына сай жұмысқа орналасқан. Десек те, жұмысшы мамандар іздеп жүрген кәсіпорындар жетерлік.
Сондай-ақ оқыңыз
Бұл ретте «Қазавтожол» ҰК Ұлытау облысы бойынша филиалының директоры Асылбек Мұханбетжанов алдағы жылы жұмысы басталады деп күтіліп отырған Жезқазған-Қызылорда тасжолын жөндеу жұмыстарына кемі 100 жұмысшы маман қажет екенін, алайда жергілікті жерден тарту көзделген бұл мамандықтарға керек жұмысшылардың тапшылығы қазірден сезілуде екенін айтты.
Жиын барысында колледж басшылары мен компаниялар арасында студенттерді іс-тәжірибеден өткізу бойынша да бірқатар ұсыныстар айтылды.
Гүлім МАРАТҚЫЗЫ.
