Әріптесіміз Шахмұрат Ибадатұлының жаңа басылымы «Өмір шуағы» аталған екен. Жинаққа өзі қызмет ететін аймақтық «Мысты өңір» газетінде соңғы жылдары жарияланған таңдамалы туындылары топтастырылған.
Кітап екі бөлімнен тұрады. Бірінші бөлім «Ұлытаулық дара тұлғалар» аталыпты. Мұндағы мақалаларының басты кейіпкерлері – жоңғар басқыншыларымен шайқаста ерлігімен ел құрметіне бөленген Барлыбай батыр, 1938 жылы «халық жауы» атанып атылған ұлт зиялысы Бірмұхамед Айбасов, кезінде Қазақ КСР Министрлер Кеңесі төрағасының орынбасары, Қазақ КСР Әлеуметтік қамсыздандыру министрі болып, мемлекеттік жоғары лауазымдық қызметтер атқарған Қарсақбайдың тумасы Зәуре Сәдуақасқызы Омарова. Сондай-ақ автор бүгінгі замандастарымыз, әдебиет әлемінде дарындылығымен танылған Кенжебай Ахметовтің ғалым тұрғысындағы ізденісін жан-жақты баяндаса, ал асқақ дауысты дәстүрлі әнші Серік Оспановтың шығармашылық тұлғасын барынша суреттейді. Ал келесі бір мақаласында кезінде өнер көгінде өзіндік үнімен танылған «Қаракөз» ансамблі туралы сыр шертеді.
Жаңа кітаптың «Ерте солған гүлдер» аталған екінші бөліміне журналистің шығармашылық және бір қырын танытатын детективтік туындылары жинақталған екен. Шытырман қылмыстық оқиғалардағы қатыгездік пен жат пиғылды арқау еткен шығармалары оқырмандарын бейжай қалдырмайды.
Ай НУРИ.
