Елордада «Жаңа Қазақстанның 100 жаңа есімі» атты республикалық байқауы мәреге жетті. Еліміздің түпкір-түпкірінен 200-ден аса үміткер қатысқан додада Жезқазған қаласының тұрғыны, кенші, ат әбзелдерін жасау шебері Далабай Оспановтың мерейі үстем шықты.
Үміткерлер байқау шартына сәйкес, «Ел дамуына қосқан үлестері» тақырыбында бейнебаян әзірлеп, қазылар алқасының назарына ұсынды. Жаңаарқа ауданының Қараағаш ауылында «ағаш ұстасы, ертоқым шебері» атанған атасының жолын қуып, бала жастан әуестене келе, кейін біржола бет бұрған сүйікті ісі – ердің неше түріннен бастап, ат әбзелдерін жасап келе жатқан Далабай Нәбиұлының халықтың қолөнерін дамытуға сіңірген еңбегі жоғары бағаланды.
Әбден төселіп, ертоқым жасаудың хас шебері атанған Далабай халықтың көне өнерін тірілтіп қана қоймай, талмай ізденудің арқасында ертоқымның алуан түрін жасайтын деңгейге көтерілді. «Өнердің де киесі бар» демекші, негізгі кәсібі жерастынан кен қопарған кенші, бос уақытының барлығында дерлік – Далабай ұста ерге арналған ағашты сонау туған ауылы Қарағаштан талмайтаңдап, жалықпай баптап барып қана шаба бастайды. Сондықтан, оның қолынан шыққан ердің қай-қайсысы болмасын, аса сапалығымен, ат арқасына сызат түсірмесін келісті келбетімен ерекшеленіп тұрады.
Міне, Далабай ұстаның халықтың төл өнерін дамытудағы осы ыждахаттығы мен зор жауапкершілігін қазылар лайықты бағалады. Айта кетейік, бұл республикалық байқау Президент Қасым-Жомарт Тоқаевтың «Жаңа Қазақстан: жаңару мен жаңғыру жолы» атты халыққа Жолдауынан туындайтын міндеттерді қоғамға кеңінен насихаттау мақсатында «Аманат» партиясы мен «Білім Өркениет» ұлттық инновациялық саяси ғылыми-зерттеу орталығы ұйымдастырған.
Ай НҰРИ.
