Қаныш Сәтбаев атындағы Жезқазған тау-кен өндірісіне қарасты мамандандырылған жөндеу-механикалық басқармасындағы «КәсіпҚорған» кәсіподағы комитетінің төрағасы Серік Алтынбеков «Жомарт» кенішінде болды.
Дәстүрлі жұмыс орындарын бақылау мен жұмысшыларды аттестациялау аясында комитет төрағасы арнайы топ құрамында басқармаға қарасты № 2 учаскенің ұжымымен кездесті. Жұмысшылармен жүздесу барысында Серік Советұлы еңбеккерлерді толғандырып жүрген мәселелерін тыңдап, оларға жауап берді.
– «Жомарт» кенішіндегі учаскенің жоспарға сай жұмыс атқаруы кен өндірісін ілгерілетіп отырғаны сөзсіз. Өйткені, жөндеу мен механикалық қызмет кен саласына ауадай қажет. Сондықтан жұмыс орнын бақылап, ондағы түйткілді жайттарды шешу кезек күттірмейтін мәселе, – деді комитет төрағасы.
